பட்டறிவும் பாடமும் .....

நீரில் பகையும் உண்டோ !

2011-12-27T16:42:00.004+05:30

நீரில் பகையும் உண்டோ !

-------------------------------------

விருந்தினன் நட்டான் ஒரு மரம் !

அருந்தி மகிழும் அமுதாய் !

மருந்தின் மிக்க கனிகள்

நாளும் தந்தது நல்லுயிர் வாழ !

நாடும் மக்களும் மகிழ்ந்தனர் !

காலம் சென்றது காற்றாய் !

மரமும் வளர்ந்தது மண்ணில் !

காய்த்துக் குலுங்கிய கிளைகள் !

கனிந்து மணந்த கனிகள் !

சுவைத்து மகிழ்ந்த மக்கள் !

சூறாவளியாய் வந்தது ஒர்புயல் !

சுற்றுச் சூழல் பொங்கி எழுந்தது !

இல்லாததை இருப்பதாய் ஓர் கதை !

கதைக்குக் கண்ணும் காதும் முளைத்தது !

உதைக்கும் கால்கள் ஓடி வந்தன !

நியாயத்தை நீதியை நேர்மையை

எங்கே விற்றனர் மாந்தர் ?

பொய்யை விதைக்க பூகம்பம்

வந்தது ! பூர்வீகம் சொல்லும்

கதைகள் கருத்தை மறைத்தன !

நீரும் நிலமும் இயற்கை !

காற்றும் நெருப்பும் வானும்

வாழும் மக்களும் வையகம் !

பயிரும் உயிரும் வாழ - பாயும்

நீரில் பகையும் உண்டோ ?

----------------------------------------------------------------------

முல்லை பெரியாறு அணையால் எழுந்த எண்ணம் .

----------------------------------------------------------------------

செல்வி ஷங்கர்

இயற்கையைக் காப்போம்

2011-12-15T19:11:00.003+05:30

வானம் நமக்கொரு போதி மரம் ! நாளும் புவிக்கொரு சேதி சொல்லும் ! ஆனால் இன்று வனங்களை அழித்து வாழ்வாதாரத்தைப் பெருக்குவதால் அந்த இயற்கைப் பரப்பும் மாசு படர்ந்து விட்டது. ஞாயிற்றைப் போற்றுவதும் திங்களைப் போற்றுவதும் மாமழையைப் போற்றுவதும் நம் மரபு. காடு மலைகளை வணங்குவதும் மரம் செடி கொடிகளை வாழ்த்துவதும் நம் மக்களின் பாரம்பரியம். ஏரி குளங்களை மலர் தூவி விளக்கிட்டு வணங்குவர் நம் மக்கள். கோடை காலத்தில் தெய்வங்களைக் குளிர்விக்க பூக்களைச் சொரிவதும் குளிர் காலத்தில் கார்த்திகை விளக்கிட்டு மகிழ்வதும் இம்மண்ணின் மாண்பு. இந்தப் பழக்க வழக்கங்கள் எல்லாம் நம் முன்னோர் இயற்கையைக் காப்பதற்காக ஏற்படுத்திக் கொண்டவை. ஆனால் இயந்திர மயமாகி விட்ட இன்றைக்கு நாம் இயற்கைச் சூழலைக் காப்பாற்றத் தவறி விட்டோம். செயற்கைப் பழக்க வழக்கங்களால் சுற்றுச் சூழலை மாசு படுத்துகின்றோம். சுவாசிக்கின்ற காற்றைக் கூட ஆக்சிசன் செண்டர்களில் பெற வேண்டிய நிலைமைக்கு ஆளாகி விட்டோம். குடிக்கின்ற தண்ணீர்தான் இன்றைக்கு நம் நாட்டின் முதல் தரத் தொழிற்சாலை.

விளைகின்ற நிலம் கூட செயற்கைச் செறிவூட்டப்படுகின்றது. பயிர் வளர்ச்சியோ உரங்களைப் பொறுத்து அமைகின்றது. சூரிய ஒளி ஒன்றுதான் இன்னும் மாசு படுத்தப்படவில்லை. காரணம் அது நம்மைச் சுட்டெரிப்பதாலோ ! காற்று மண்டலம் கூட பூமியால் மாசு பட்டுக் கொண்டே வருகின்றது. சுவரில் ஆணி அடிப்பது போல ஓசோன் படலத்திலும் ஓட்டை போட்டுக் கொண்டே இருக்கின்றோம். இதில் மட்டும் உலக நாடுகளில் வளர்ந்த நாடு வளர்ந்து வரும் நாடென்ற வேறுபாடெல்லாம் இல்லை ! அவ்வளவு ஒற்றுமை உலகை உருக்குலைத்ததில் ! காற்று - நீர் - மழை - மலை - காடு - ஏரி - குளம் - நிலம் - என்று எல்லாவற்றையும் கெடுத்துக் குட்டிச் சுவராக்கி விட்டோம். இதில் நாம் மட்டும் என்ன உருப்படியாய் இருக்கின்றோம் ? தீராத நோய்கள் நம்மில் குடி கொண்டு இருக்கின்றன. வளரும் இளந்தளிர்கள் வகை வகையான நோய்களுக்கு ஆளாகின்றன. ஆக மொத்தத்தில் இயற்கையைப் பழி தீர்த்துக் கொண்டு விட்டோம் ! இன்னலுக்கு ஆட்பட்டுக் கிடக்கின்றோம் !

இனி நாம் செய்ய வேண்டியது என்ன ? காப்போம் ! காப்போம் ! இயறகையைக் காப்போம் ! என்று முதலில் ஒரு சூளுரை ஏற்க வேண்டும். அடுத்து நம்மைச் சுற்றி உள்ளவர்களிடம் இயற்கையை அழிக்காதவாறு விழிப்புணர்வை ஏற்படுத்த வேண்டும். பின்னர் நாம் செயல்முறையில் இறங்க வேண்டும். முதலில் வீட்டிற்கொரு மரம் வளர்க்க வேண்டும். அடுத்து குப்பை கூளங்களைக் கண்ட இடத்தில் கொட்டாமல் தரம் பிரித்து இந்தப் பாழாய்ப் போன பாலீதினை முதலில் ஒழிக்க வேண்டும். உள்ளூரில் உள்ள நீர்நிலைகளைத் தூர் வாரி ஏரி குளங்களின் கரைகளை உயர்த்தி அருகில் மரங்களை நட்டு மழை நீர் சேகரிப்புக்கு வழிவகை செய்ய வேண்டும். நம் சமுதாயத் தொண்டும் வழிபாடும் ஒன்றாக அமைய வேண்டும். என்னதான் காலங்கள் மாறினாலும் நாம் கடவுளைக் கும்பிட மட்டும் இன்னும் மறக்காமல் இருப்பது போல் இயறகைச் சூழலைப் பாதுகாக்க வேண்டும். மரங்களை நடுவதை மகேசன் தொண்டாகக் கருத வேண்டும்.

விளை நிலங்களில் கட்டடங்கள் கட்டுவதைத் தடுத்து நிறுத்த வேண்டும். சட்டத்தின் துணை கொண்டு தவ்று நடப்பதைச் சுட்டிக் காட்ட வேண்டும்; தட்டிக் கேட்க வேண்டும். நகரினுள் வரைமுறை மீறிய கட்டுமானங்களுக்கு நாம் வழிவகை தேடக் கூடாது. தொழிற்கூடங்கள் நாட்டின் பொருளாதார வளர்ச்சிக்குப் பெருந்துணை புரிகின்றன என்றால் அதை விடச் சுற்றுச் சூழலுக்குப் பெருங்கேடு விளைவிக்கின்றன. நிலத்தடி நீரை மாசுபடுத்தும் தொழிற்சாலைக் கழிவுகளை மறு சுழற்சி செய்து மண்ணின் மணம் மாறாமல் மரம் வளரத் துணை செய்ய வேண்டும். இன்றைக்குக் கல்வி அறிவிற்குக் குறைவே இல்லை ! அனைவரும் அனைத்துத் துறையிலும் கற்றுத் துறை போகின்றனர். ஆனால் குறுக்கு வழியில் கொள்ளை இலாபம் பெறவே அந்த அறிவைப் பயன் படுத்துகின்றனர்.

சுற்றுச் சூழல் மாசினை ஒழிக்க முடியாமல் கழிவுப் பொருளைக் கரை சேர்க்க வழி இல்லாமல் உலக நாடுகள் எல்லாம் தட்டுத் தடுமாறிக் கொண்டிருக்கின்றன. ஆனால் நம் நாடோ இயற்கை வளமும் அழிவினில் ஆக்கமும் பெறுவத்ற்கேற்ற சூழலும் கொண்ட நாடு. ஆனால் இங்குள்ள மக்க்ளோ அடிப்படைத் தூய்மையைக் கூடக் க்ற்றுக் கொள்ள மனமில்லாதவராய் இருக்கின்றனர். வளர்கிறது இந்தியா ! ஆனால் அடித்தட்டு மக்களை அந்த வளர்ச்சியில் பங்கு கொள்ள இயறகையை நோக்கி அழைத்துச் செல்லத் தயங்குகிறது ! நாம் ஓவ்வொருவரும் நம்மைப் போன்ற ஒவ்வொருவரையும் நாட்டை வளமாக்க அழைத்துச் செல்வோம் ! காடுகளை அழிக்காமல் மலைகளைத் தகர்க்காமல் மண் வளத்தைத் திருடாமல் நீர் நிலைகளைக் கழிவு நீர்கள் கலக்காமல் நீராதரங்களில் நிலத்தடி வளத்தைச் சுரண்டாமல் செயற்கைக் கருவிகளால் கரியமில்வாயுவைப் பெருக்காமல் புவி வெப்பமடைதலைத் தடுக்கும் வழிமுறைகளைக் கடைப்பிடித்து, இருக்கின்ற நீர் நிலைகளைப் பாதுகாத்து நிலங்களை வளப்படுத்துவோம் ! மறந்து போகின்ற - மறைந்து போகின்ற வேளாண் தொழிலை புது முறைக் கல்வித்துறைகளால் மேம்படுத்தி மேதினியைக் காப்போம்.

காக்கை குருவி எங்கள் ஜாதி !

காடும் மலையும் எங்கள் கூட்டம் !

நோக்க நோக்கக் களியாட்டம் !

என்ற இயற்கைக் கவிதையை மீண்டும் பாடுவோம்.

காணி நிலம் வேண்டும் பராசக்தி !

அந்தக் காணி நிலத்திடையே ஒரு மாளிகை கட்டித் தர வேண்டும் !

அங்கே கேணி அருகினிலே பத்துப் பதினாறு தென்னை மரம் பக்கத்தில் வேண்டும். அந்த மரத்திடையே கத்தும் குயிலோசை சற்றே வந்து என் காதில் விழ வேண்டும். இந்த இயறகைச் சூழலை இன்றைக்கு உருவாக்குவோம்.

இயற்கையைக் காப்போம் ! எதிர் காலச் சமுதாயத்தை ஏற்றமுறச் செய்வோம் ! எதிரெதாக் காக்கும் அறிவினார்க்கு இல்லை அதிர வருவதோர் நோய் !என்ற வேத மந்திரத்தை விளக்கமுறச் செய்வோம் ! வருங்காலச் சமுதாயத்தை வளமுறக் காக்க இயற்கையைப் போற்றி வாழ்வோம் ! இனிய உலகைப் படைத்துக் காட்டுவோம் !!!

செல்வி ஷங்கர்

அதுதான் முதுமையோ !

2010-12-10T21:35:00.002+05:30

மாறும் உலகில் புதுமை !

பழமை நினைவில் நிகழ்வு !

அன்பு மனத்தில் அமைதி !

ஆற்றும் செயலில் அருமை !

பழகும் நட்பில் உறவு !

பண்பாய்ப் பழகிய பெரியோர் !

வளர்ந்து விட்ட மழலையர் !

படித்துச் சுவைத்த கருத்துகள்!

எல்லாம் நினைவில் இனிமை !

என்றும் கருத்தில் இளமை !

நிகழ்வில் மட்டும் தனிமை!

அது தான் வாழ்வில் முதுமையோ !

என் எழுத்து வலையில்

2010-12-08T21:49:00.003+05:30

எழுதுவதற்கு ஏடும்

படிப்பதற்கு நூலும்

கைக்கெட்டும் இடத்தில் !

அமர்வதற்கு இருக்கை !

ஆற அமரப் பார்ப்பதற்கு

அழகான காட்சி காலதரில் !

அன்பான சிந்தனையில்

அருமையான பாட்டு

வானொலியில் !

மின் விசிறி இல்லாத மென் காற்று

மாலை நேரப் பறவையாய்

மழலையரின் வருகை !

கைப்பிடித்து ! காரில் !

பாசமுள்ள தந்தையின் தோளில் !

பார்வைப் புன்னகை !

மின்னும் விழிகள் !

வித விதமாய் உடைகள் !

பொம்மைகள் போலே

மழலையர் !

சுதந்திர உடையில்

இறகுப் பந்துகள்

இங்கும் அங்கும் துள்ள

இளமென் நடையினர் !

இவரெல்லாம் என் சிந்தையில் !

சில நேரம் என் எழுத்து வலையில் !

செல்வி சங்கர்

இனிய பிறந்தநாள் நல்வாழ்த்துகள்..

2010-10-03T17:54:00.005+05:30

அன்பின் சுஜா!

அருமைப் பிறந்தநாள் இன்று!
இனிமைகள் சேர்க்கும் என்றும்!
ஆண்டுகள் இயங்கும் மேலே
நாமும் இயற்றுவோம் மேன்மை!
பிள்ளைகள் வளர்ச்சி பெருமை!
பெற்றோர் மகிழும் உண்மை!
ஆடிஓடி ஆற்றுவோம் கடமை!
இயக்கம் ஒன்றே இயல்பு!
இறைவன் படைத்த உலகில்!
இனிதாய் செய்தால் வழிபாடு!
தலைவன் மகிழ, தமிழ் போல் வாழ்க!
தந்தவர் மகிழ, தரணியில் வாழ்க!
பிள்ளைகள் மகிழ, பெரிதும் உயர்க!
போற்றும் கடவுள்
பொன்கர மூர்த்தி!
புனிதனே அருள்வான்!
இனிய கணபதி
இதயத்தில் உறைவான்!
என்றும் வாழ்க!!!

அன்புடன்
அப்பா! அம்மா!
பிரியா!! மணி!!
நாதன்!!! நீனா!!!

எங்கே ? எங்கே ?

2010-09-04T19:06:00.004+05:30

குருவி கூவுகிற என் குடிலில்
குலவி மகிழும் மரங்கள் !
கூண்டுகள் போலே மாடங்கள் !
மகிழ்வாய் இருக்கிறது மனத்திற்கு !
மழை வரும் போல மேகங்கள் !
மலைகள் தாங்கும் வானம் !
மாலை நேர மந்தாரம் !
மனம் மகிழும் மரக்கோலம் !
காற்றடித்துக் கலைகின்ற வானம் !
நேற்றைய நிலைமை திரும்புமா ?
நிலம் வெடிக்கும் வெக்கை மாறுமா ?
அடுக்கு மாடி 'ஏசி'க்கள் மேலே குயில்கள் !
அலை பாயும் கேபிளில் வரிசையாய் காகங்கள் !
பச்சை மரங்களின் கீழே கார்களின் வரிசை !
காய்ந்து கிடக்கும் ஆற்று வெளியில் குப்பைகள் !
தெப்பம் மறந்த குளத்தில் கிரிக்கெட் !
இன்னும் கொஞ்ச நாளில் இங்கே
இயற்கை எங்கே ? எங்கே ?

செல்வி ஷங்கர்

அந்த மொழி அதுவாய்க் கேட்குமா ?

2010-06-23T05:24:00.004+05:30

என்ன சொல்கிறார்கள் இவர்கள் ?
ஒன்றும் புரியவில்லை எனக்கு !
இருக்கு என்கிறார்களா ? இல்லை
இருந்தது என்கிறார்களா ?
எத்தனையோ கோடியில்
எழுப்பப்படுவதெல்லாம்
இவனுக்கு எழுதப் பயன்படுமா ?
தெரியாத ஒன்றைத் தெரிவிக்குமா ?
அம்மா நா(ன்) பள்ளி செல்கிறேன்
என்ற மொழி அதுவாய்க் கேட்குமா ?

செல்வி ஷங்கர்

ஊட்டி மலையில் உறவுகள்

2010-05-12T22:45:00.004+05:30

பதிவர் உயர்திரு லதானந்த், இணைய நண்பர்களை குடும்பத்துடன், இரண்டு மூன்று நாட்கள் அவரின் விருந்தினராக, ஊட்டியில் வந்து தங்கி, வெம்மையைச் சற்றே மறந்து, உதகையின் குளுமையில் மகிழ்ந்து செல்லுமாறு அன்புடன் அழைத்து இருந்தார். அவ்வழைப்பினை ஏற்றுச் சென்ற சுற்றுலாப் பதிவு.

அது ஒரு அந்தி மாலைப் பொழுது ! அதுவும் மழைத் தூறல் சாரல் அடிக்கும் மாலை! சில்லென்ற காற்று வீசும் உதகை மலைச் சாலை ! வலைப்பதிவர்கள் சிலரைத் தாங்கிச் செல்லும் சிற்றுந்துகள் ! அழகான மச் சூழல் ! மரங்கள் அசைந்து வரவேற்கும் புல்வெளிக்கிடையே வீற்றிருக்கும் விருந்தினர் இல்லம். அங்கே ஒவ்வொருவராக வந்து சேர்ந்த பதிவர் குடும்பங்கள். ஆம் ! பிள்ளை குட்டிகள் மற்றும் துணைவியோடு வந்தனர். அறிமுகமே இல்லாத முகங்கள் - ஆனால் புன்னகைக்கும் உள்ளங்கள் ! புருவம் உயர்த்தும் புன்சிரிப்புகள்.கட்டித் தழுவி கை கொடுத்து மகிழும் ஐந்து குடும்பங்கள். ஆறாவதாய் வந்திணைந்த இளையவர் ஒருவர். இந்த இருபத்தொருவரையும் ஒருங்கிணைத்த உள்ளத்தார் லதானந்த்.

முன்பின் அறிந்திராத குடும்ப உறுப்பினர்கள் ! குடும்பத் தலைவர்கள் மட்டுமே வலைப் பதிவால் ஒருவரை ஒருவர் அறிந்தவர்கள் ! புன்னகைக்கும் முகங்களாய் ஒரு 30 மணி நேரத்தைச் செலவிட்ட பதிவர் குடும்பங்கள் ஆறும், ஐந்து விரல்கள் உள்ளங்கையில் இணைந்தது போல் உண்டு - உடுத்தி - உறைந்து - கண்டு - களித்து - கனிவாய் மலர்ந்து - இருந்த மலைப்பகுதி ! மலையை - மரங்களை - பள்ளத்தாக்குகளை - சிற்றருவிகளை - சிறு ஓடைகளை - பெரிய ஆற்றுப் படுகையைக் கண்டு மகிழ்ந்து காலாறச் சென்றனர்.

இருபத்தோறு பேரும் ஒரு மகிழ்வுந்தில் பாடி - பேசி - பழகிச் சிரித்து - மகிழ்ந்து - மரங்கள் அடர்ந்த் காட்டு வழியைக் கடந்து - கனிவான காட்சிகளை க்ண்ணுக்குள்ளும் புகைபப்டக் கருவிக்குள்ளும் அடக்கி - பெருமணற் பரப்பைக் காணச் சென்றனர். ஏறி இறங்கிய மலைப்பகுதியும் - சிற்றோடைப் பரப்பும் ஒரு புதிய அனுபவம் - புன்னகைக்கும் உள்ளங்களுக்கு !

விண்ணின் மழை மன்ணில் கலப்பது போல் - மலைக்காற்று - மரங்களிடைப் பரவி மண்ணை அடைவது போல் - கோவை - மதுரை - திருப்பூர் - திருச்சி என்று எங்கெங்கிருந்தோ வந்து இந்த ஊட்டி மலையில் உறவுகளோடு நட்பு மணம் பரப்பி, பேசி மகிழ்ந்த உள்ளங்கள் ! வயது வேறுபாடு இல்லை - நாலு, ஆறு, பத்து வயதுக் குழந்தைகளோடு, ஆடிப்பாடி மகிழ்ந்து - இளைஞர்களோடு பேசாமல் பேசி உறவாடி - பதிவர்கள் ஒருவருக்கொருவர் பேசி மகிழ - குடும்பங்கள் உறவாடி மகிழ்ந்தன !

ஒரு நல்ல பொழுதைப் போல் காலத்தைக் கணக்கிட்டு ஒரு வினாடி -வினா - குறும்படக் காட்சி இரவுப் பொழுதை இனிய பொழுதாய் ஆக்கிற்று. வளரும் தலைமுறையினர் பெற்றோர்க்கும் மற்றோர்க்கும் தங்கள் ஆற்றலை வெளிப்படுத்தினர். பெற்றோரும் பிள்ளைகள் முன் பிள்ளைகளாய் மகிழ்ந்தனர். இயற்கை வளம் நிறைந்த இந்த நிலப்பரப்பில் நாம் அறிந்திராத அதிசயப் பறவைகள் - விலங்குகள் - மரங்கள் - செடி கொடிகள் - மக்கள் - கடல் - ஆறு - மலை என நாம் அறிய வேண்டிய இயற்கை வளச் செய்திகள் அவை.

காலைப் பொழுதில் காட்சிகள் காண மகிழ்ந்து சென்ற உள்ளங்கள் மலைப் பகுதியில் மகிழ்வான மதிய உணவுக்குப் பின் கலந்து கொள்ள ஒரு குறுக்கெழுத்துப் புதிர். பெண்கள் அமர, ஆண்கள் பரிமாறிய பாச உணவு ! குடும்பங்கள் இணைந்து குழுவாய்ப் பிரிந்து நடத்திய போட்டி ! வெற்றி தோல்விகள் மனிதனைப் பிரித்து விடுகின்றன என்று போலும் முடிவுகள் அறிவிக்கப் படாத அன்புப் போட்டி !

ஒருவரா இருவரா - இருபத்தோறு பேரையும் ஓரிடத்தே அமர்த்தி - உணவிட்டு - உறங்க இடம் அளித்த உள்ளங்கள் உயர்ந்தன தான் ! இணைந்த நட்புகளும், ஏற்றத் தாழ்வுகளை மறந்து மனம் விட்டுப் பேசி மகிழ்ந்து உணர்வுகளை - உணவுகளை பகிர்ந்துண்ட காட்சி இன்னும் மக்கள் இங்கே இயல்பாய்த் தான் இருக்கின்றனர் என்பதை உணர்த்திற்று எனக்கு ! உள்ளத்திற்கு உவப்பான் ஒன்று கூடல் இது !

உள்ளங்கள் உயரட்டும் ! உறவுகள் வளரட்டும் !

கலந்து கொண்ட குடும்பங்கள் :

திரு லதானந்த்
திருமதி லதானந்த்
திரு பாலாஜி லதானந்த்

திரு சீனா
திருமதி செல்வி ஷங்கர்

திரு "நிகழ்காலத்தில்" சிவா
திருமதி சிவா
குழந்தைகள் - அசுவதி - ரிதனி

திரு வேங்கட சுப்ரமணியன்
திருமதி வேங்கட சுப்ரமணியன்
மகன்கள் - வசந்த பாரதி மற்றும் விபின் சந்தர் பால்

திரு தமிழ்மணம் காசி
திருமதி காசி
திருமதி காசியின் சகோதரி
குழந்தைகள் சதீஷ், காயத்ரி, லாவண்யா மற்றும் ஒரு மழலை.

திரு கொல்லான்

அரும்பாடு பட்டு, அழைத்து, திட்டமிட்டு, ஏற்பாடுகள் பல செய்து, ஒரு சிறு குறை கூட இல்லாமல் திறம்பட - குடும்பங்களை ஒருங்கிணைத்த - திரு லதானந்த், திரு பாலாஜி லதானந்த் மற்றும் திருமதி லதானந்த் அவர்களுக்கு நன்றி கலந்த நல்வாழ்த்துகள்.

செல்வி ஷங்கர்.

பாலே நடனமாடு ....!

2010-02-16T07:53:00.005+05:30

ஏழு மாதமே ஆன எங்கள் பேத்தியின் அருகில் இருந்த போது தோன்றிய சிந்தனைகள்
-------------------------------------------------------------------------------

சின்னக் குழந்தையைப் பார்க்கையில் அதிலோர் மகிழ்வு !

அதன் புன்னகை தவழும் கன்னக்குழியை நோக்குகையில் அகிலமே நம் காலடியில் !

கையணைத்து, காலுதைத்து, கண்கள் நோக்கி, சிரிக்கையில் நம் இதயமே மென்மலர் ஆகிறது !

கற்றைக்குழல் கைகளில் பிடித்து கன்னம் ததும்பப் பார்க்கையில் படைப்புகளே நமக்காகத்தான் என்று எண்ணத் தோன்றுகிறது !

கை தட்டு ! கை தட்டு ! என்ற உடன் அந்த சின்னஞ்சிறு விரல்கள் நீள, காற்றெனத் தட்டும் ஒலி ! அப்ப்ப்ப்பா !

தென்றலுக்கு எப்படி இந்த மென்மை வந்தது !

தவழவே தெரியாத தளிர்க் கால்கள் உதைக்க 'பாலே' ஆடு என்றதும் கைகளைத் தலைக்கு மேல் தூக்கி, வளைத்து, சிரிக்கும் சிரிப்பில் இந்த உலகமே இந்திர லோகம் தான் !

அதெப்படி குழந்தையின் உருவில் இறைவன் இயற்கையைப் படைத்தான் !

இன்னும் வளருது உலகம் வானம் நோக்கி !

வாழ்த்த வேண்டாமா பிஞ்சுக் கைகளை !

வாழ்க ! வாழ்க ! வாழ்க வளமுடன் !

செல்வி ஷங்கர்

வாசகர்களின் எதிர்பார்ப்பு

2010-02-07T09:15:00.003+05:30

வலைப்பூக்களில் இடுகைகளைப் படிக்கும் வாசகர்கள் என்ன எதிர்பார்க்கிறார்கள் ?

விரல்கள் பட்டனைத் தட்டினால், கண்கள் பதிவுகளில் பார்வையைச் செலுத்தினால் சிறிது நேரம் நம் நினைவுகள் அவ்வரிகளில் நிலைக்க வேண்டும். படித்தால் சற்று மனதிற்கு மகிழ்வாக இருக்க வேண்டும். மிகவும் நம் சிந்தனையைக் குழப்பக்கூடாது. மொக்கைகள் கூட சிரித்த உடன் சில கருத்துகளை நம்மை அறியாமல் பின்னூட்டம் இடச் செய்ய வேண்டும்.

பதிவர்களின் எண்ண ஓட்டங்கள் நம் வாசகர்களின் எதிர்பார்ப்புகளில் நீந்த வேண்டும். வேடிக்கை என்றாலும், விளையாட்டு என்றாலும், வினோதம் என்றாலும், படப்பதிவுகள் என்றாலும், கற்பனைக் கதைகள் என்றாலும், காவிய ஓட்டங்கள் என்றாலும் வாசகர்கள் மனதிற்கு ஒரு மாற்றாக இருக்க வேண்டும் என்று வாசகர்கள் எதிர்பார்க்கிறார்கள்.

ஓடி வந்து இடுகைகளில் பார்வையைச் செலுத்தினால் தன் வெளியுலகச் செயல்களில் இருந்து தனக்கொரு விடுதலை கிடைக்காதா என்று எண்ணுகிற வாசகர்கள் ஏதோ ஒன்றை எதிர்பார்க்கிறார்கள். படைப்புகள் சில வாதாட வைக்கும்; சில மறுப்புணர்ச்சி காட்டும்; சில சிந்தனையின் சிதறல்களாய் வியப்பூட்டும்; சிலவற்றில் சீற்றமும் எதிர்ப்பும் எழுத்துகளாய்ப் பூக்கும். அவற்றை வாசகர்கள் ஏற்கிறார்கள்; மறுக்கிறார்கள்; உடன்படுகிறார்கள்; உறவாடுகிறார்கள்.

எங்கோ ஏதோ ஒன்றில் இயங்கிக் கொண்டிருக்கும் இவர்கள் இரவு நேரத் தூக்கத்தைக் கூடத் துறந்து இடுகைகளில் கண்ணோட்டம் இடுகிறார்கள் என்றால் அதில் அவர்களின் எதிர்பார்ப்பும் உண்டு அல்லவா. கருத்துகள் பயனுள்ளதாய் இருந்தால் செலவிடப்படும் நேரங்கள் சிறந்ததாகின்றன. பொழுதுபோக்குதான் ஆனாலும் புறஞ்சொல்லல் கூடாதே ! அழச் சொல்லி இடித்துரைக்கும் நட்பும் இங்குண்டு ! தட்டிக்கொடுத்து சிந்தித்து மகிழ்கின்ற நட்பும் இங்குண்டு ! பட்டும் படாமலும் தொட்டும் தொடாமலும் பேசி மகிழ்கின்ற நட்பும் இங்குண்டு ! முகம் தெரியாமல் முகிழ்கின்ற கருத்துகளை முழுவதுமாய் வடிக்கின்ற நட்பும் உண்டு !

எவற்றை எல்லாம் எப்படி எல்லாமோ அறிந்திருந்தாலும் தமிழில் தட்டுகின்ற எழுத்துக்கு ஓர் உணர்வு உண்டு. எதை எப்படி சொன்னாலும் தமிழில் அதற்கோர் அறம் உண்டு. அன்பு பயவாத, அறிவு புகட்டாத, அறத்தை உணர்த்தாத, ஆற்றல் விளையாத, எதையும் தமிழன் எழுத்து வடிவில் ஏற்க மாட்டான். இது மொழி உணர்வு ! இம்மொழியைப் பேசுகின்ற ஒவ்வொருவரும், எழுதுகின்ற ஒவ்வொருவரும் ஏதாவது ஒரு நற்பயனை எதிர்பார்க்கிறார்கள். அது சிந்தைக்கும் செயலுக்கும் சற்று நலம் பயப்பதாய் இருக்க வேண்டும் என்று எதிர் பார்க்கிறார்கள். எதிர் பார்ப்பு இல்லாத எந்தச் செயலும் ஏமாற்றம் தானே !

ஓய்வு நேரத்தைப் பயனுள்ளதாய் ஆக்குகின்ற வலைநட்பு, இடுகைகளில் படிப்பவர் உள்ளங்களைக் காண வைக்கின்றது. வாசகர்கள் படைப்புகளில் பார்வை செலுத்தும் போது அவை சுவையுடையதாய்ச் சொல்லப்பட வேண்டும் என்று எதிர்பார்க்கிறார்கள்.

மிக நீளமாக, பொறுமையைச் சோதிக்கக் கூடிய பக்கங்களில் கருத்துப் புதையல்கள் இருக்கின்றன. ஆனால் அவை சுருக்கமாக இருந்தால் மட்டுமே வாசகர் அனைவருமே அவற்றைப் படிக்கின்றனர். எழுதி அஞ்சல் செய்யப்படாத அஞ்சல்களாய் இருப்பதை விட அவை எழுதப்படாமலேயே இருந்திருக்கலாம். வாசகர்கள் குறும் படைப்புகளை விரும்பிப் படிக்கின்றனர். நீண்ட படைப்புகள் சுவையூட்டக் கூடியதாயும் படிக்கத் தூண்டுவதாயும் இருக்க வேண்டும் என எதிர்பார்க்கின்றனர்.

பதிவர்கள் பலவிதம் என்று ஒரு இடுகை ஏற்கனவே இட்டிருக்கிறேன்.

இரண்டையும் படித்து, கருத்துக் கூறுங்களேன் !

நல்வாழ்த்துகள் அனைவருக்கும்
செல்வி ஷங்கர்

குட்டி தேவதை

2009-12-30T22:29:00.000+05:30

குட்டி தேவதை ! எந்தன்
குட்டி தேவதை !

எட்டி எட்டிப் பார்த்திடும் !
கட்டி முத்தம் தந்திடும் !

பட்டுப் போல படர்ந்திடும் !
விட்டில் போல விரைந்திடும் !

சின்னப் பாதம் தொட்டிட்டால்
கன்னங் குழிய சிரித்திடும் !

குறும்புப் பார்வை பார்த்திடும் !
கரும்பு போல சுவைத்திடும் !

குட்டி தேவதை ! எந்தன்
குட்டி தேவதை !

----------------

எங்கள் குட்டிப்பேத்தியுடன் சில நாட்கள் இருந்தபோது
மனத்தில் ஓடிய அடிகள் !

செல்வி ஷங்கர்

பதிவுகள் பலவிதம் - ஒவ்வொன்றும் ஒரு விதம்

2009-10-06T21:35:00.002+05:30

பறவைகள் பலவிதம் - ஒவ்வொன்றும் ஒரு விதம் ! வானமெங்கும் ஓடி வானிலவைத் தேடி வண்ணங்கள் தீட்டுவது மனித மனம். அது ஒன்று போல் ஒன்று இருப்பதில்லை. ஆனாலும் வடிகால் என்ற ஒரே நோக்கம் இங்கிருப்பது வியப்பே !

பல்வேறு பட்ட கருத்துகள் - பலதரப்பட்ட சுவைகள் - பலவாறான எண்ண ஓட்டங்கள் - எங்கு செல்வது ? எங்கே நிற்பது ? எதில் துவங்குவது ? தொட்டபின் தோல்விகள் - நிகழ்வுகளின் முரண்பாடு - ஏற்ற இறக்கங்கள் என்று எப்படி எப்படியோ எண்ணங்கள் இங்கே வலையில் அகப்ப்படுகின்றன.

மீன் பிடித்து மீண்டும் ஆற்றில் விட ஆசை என்பது போல் எழுத்து வடிவில் ஏக்கங்கள் - தூக்கங்கள் - துயரங்கள் - துன்ப வரைவுகள் - இன்ப நிகழ்வுகள் என எத்தனை எத்தனையோ இந்த வலைப்பூவில் பூக்கின்றன.

பதிவர்களின் நோக்கம் இடுகைகளில் தங்கள் இதயத்தை வடித்து விட வேண்டும் என்பதாகத்தான் இருந்திருக்கிறது. இது ஒரு தனிப்பட்ட நாட்குறிப்பு. பலரும் காண விரித்து வைக்கப்பட்ட நிலாப் படம். மொக்கைகள் தான் பெரும்பாலும் எல்லோராலும் சுவைக்கப் படுகின்றன.அவற்றினிற்குத்தான் ஆயிரக் கணக்கான மறு மொழிகள் .

சிந்தனை வாதிகளின் இடுகைகள் பலராலும் படிக்கப்பட்டாலும் மறுமொழிகள் மிகுதியாய்ப் பெறப்படுவதில்லை. நீண்ட இடுகைகள் நைல் நதியையும் மிஞ்சி விடுகின்றன. அவை பட்டனைத் தட்டியே நீளம் பார்த்து நகர்த்தி விடப்படுகின்றன. கதைகள் காளான் பூத்தது போல் தென்படும். சுவைத்தவர்கள் மறு மொழிகளில் தங்களைப் பதிவு செய்வர்.

சிரிப்பென்று சிரிப்பே வராத சிந்தனை வாதிகளின் சில இடுகைகளும் உண்டு. வரலாற்றுப் பதிவுகள் அங்கொன்றும் இங்கொன்றுமாய்க் காணப்படும். அதில் பதிவர்களின் ஆழந்த சிந்தனை ஓட்டம் புலப்படும்.

கவிஞர்கள் தான் கவிதைப் பூங்காவில் பூத்துக் குலுங்குபவர்கள். காதல் கவிதைகள் இளமையின் நிழலாய்த் தோன்றும்.துன்பக் கவிதைகள் துயர நினைவின் சிந்தனை அலை வீசும். சமுதாயப் பார்வையாளரின் கவிதைகள் உண்மையிலேயே உள்ளத்தைத் தொடும். உழைப்பின் உருவம் அவர்களின் எண்ண ஓட்டங்களில் தென்படும்.

செய்திகளைப் பதிவுகளில் இடுபவர்கள் சிலர். உலகச் செய்திகள், உள்நாட்டுச் செய்திகள், உவகை ஊட்டும் நடிப்புச் செய்திகள், நாளெல்லாம் காண்கின்ற கேட்கின்ற நடைமுறைச் செய்திகள் என்று கவிஞர்கள் காவியமே புனைகின்றனர்.

படக்காட்சிகள்! இயற்கை! இயற்கையின் சீற்றம்!கடல்! காடு! மலை! விலங்கு! பறவை! கட்டடம்! திருவிழாக்கள்! தேரோட்டங்கள்! வாழ்க்கை! என்று நிழற்படங்களைப் பதிவுகளில் இடுவோர் பலர். கண்ணுக்கும் கருத்துக்கும் அவை சுவை கூட்டுகின்றன. இவை எல்லாம்
இவற்றின் நல்ல பக்கங்கள்.

மறு பக்கம் என்று ஒன்று உண்டல்லவா! அதன் விளைவு மேலானதாக இருப்பதில்லை. மனிதப் பண்பாட்டைச் சிதைப்பதாய் இருக்கின்றன.சில படக்காட்சிகள் கண்களை வலிக்கச் செய்கின்றன. சில கருத்துப் பதிவுகள் சிந்தனையை சீர்குலையச் செய்கின்றன. கருத்து சுதந்திரம், எழுத்து சுதந்திரம் என்று உலகினர் சிலரைச் சீண்டிப் பார்ப்பதும் சற்றே இடிக்கின்றது.

எண்ணங்கள் எழுத்துரு ஆகும் போது இலக்கணங்களை மீறாமல் இருந்தால் இனிமை சேர்க்கும். அறியாத வயதினர் ஆழ்ந்து தேடும் பக்கங்கள் மனத்தினை அலைபாயச் செய்கின்றன. பொழுது போக்காக, மன மாற்றாக, ஓய்வு நேர ஈடுபாடாக உயர்ந்த சிந்தனைகள் ஆங்காங்கே வலையில் பூப்பதும் உண்டு.

சிரிப்பதும் சிந்திப்பதும் பார்ப்பதும் கேட்பதும் பேசுவதும் எழுதுவதும் இளைப்பாறுதலாக இருக்கும் போது குழுமங்களும் பதிவுகளும் இடுகைகளால் சிறக்கின்றன. சிந்தனைப் பூக்க்கள் சிலிர் காற்றில் சிரித்து மகிழ்கின்றன. வெயிலுக்கு நிழலாக மழைக்குக் குடையாக இருந்தால் மகிழ்ச்சி தானே !

செல்வி ஷங்கர் - 06.10.2009

சில நேரங்கள்

2009-05-14T21:24:00.002+05:30

சில நேரங்கள்
சில நேரங்கள் தான் !
அருமையான பாட்டு !
அழகான பேச்சு !
ஆழமான கருத்து !
எளிதான வாழ்க்கை !
இனிமையான சிந்தனை !
எட்டிப் பார்க்கும் ஆசைகள் !
எண்ணிப் பார்க்கும் சில்லறை !
எப்போதும் வரும் மாதக் கடைசி !
எப்படியோ நிறைவான வாழ்க்கை !
வளர்ந்து விட்ட பிள்ளைகள் !
வழி தேடிய வாய்ப்புகள் !
காலூன்றிய காலங்கள் !
கதை பேசிய பொழுதுகள் !
கஞ்சி குடித்த நேரங்கள் !
காலில் சக்கரம்
கட்டிய கடமைகள் !
அடித்துப் போட்டாற் போல்
தூங்கிய நாட்கள் !
அனைத்தும் நினைவில் ! ஆம் !
சில நேரங்கள்
சில நேரங்கள் தான் !

செல்வி ஷங்கர்
-------------------------

பசங்க - திரைப்பட விமர்சனம்

2009-05-13T22:34:00.002+05:30

இன்று பாராளுமன்றத் தேர்தல் - காலை ஓட்டளித்து விட்டு மாலை பசங்க திரைப்படம் சென்றோம்.

பாராட்டுகள் பச்சிளம் குழந்தைகளைப் பாராளவும் செய்யும். எண்ணங்களை நல்வழிப்படுத்துதல் ஒவ்வொரு பெற்றோரின் தலையாய கடமை. வளரும் உள்ளங்களை வழி காட்டி அழைத்துச் செல்வதைப் போல் உள்ளது "அன்புக்கரசன் IAS - ஜீவா CM - ரேணூகா Doctor" என்று பசங்க சொல்வது.

இயக்குனர் நன்றாகவே சிந்தித்துள்ளார். எண்ணங்களால் ஏணிப்படிகளைத் தொட்டுள்ளார். திரைப்படங்கள் எப்படியோ சென்று கொண்டிருக்கிற காலத்தில் இயல்பான சிந்தனையால் பார்ப்பவர்களை சிந்திக்க வைக்கின்றார். சிறுவர்களைச் சீர்திருத்த வேண்டுமல்லவா !

அன்பு -ஆத்திரம் - பண்பு - பாசம் என்ற குடும்பச் சூழலில் குட்டிப் பசங்களை ஒரு நல்ல வழிக்கு அழைத்துச் செல்வது பள்ளியும் வீடும் தான் என்று ஒற்றுமைக்கு நாட்டுப் பற்றை நினைவில் கொண்டு வந்தது நல்ல காட்சி. பார்த்துக் கொண்டிருந்த நானும் சனகனமன என்ற உடன் எழுந்து நிற்கத் துவங்கி விட்டேன் - திரையரங்கினில்.

எண்ணங்கள் செயல்களாக - செயல் எப்போதும் நினைவில் நிற்க வேண்டும் என்பதை அன்பு வழியில் வாழும் காந்தியடிகளை - ஆம் - அப்துல் கலாமை நினைவில் கொண்டு வந்தது பசங்க திரை ஓவியம்.

விட்டுக்கொடுத்தலும் கை தட்டிப் பாராட்டுதலும் ஊக்கமளிக்கின்ற ஆசிரியப் பணி. இறுதியில் ஜீவாவின் மடல் - very sorry - very sorry என்பதனை பல தடவை எழுதி - பந்தயத்தின் தோல்வியினால் இந்திய அஞ்சல் தலை ஐம்பது அனுப்புவது பள்ளிக் குழந்தைகளின் மன நிலையினை அழ்குற எடுத்துக் காட்டுகிறது.

கிராமியச் சூழ்நிலை - கிராமியப் பள்ளி - உயர் பள்ளி - இயல்பாகக் காட்டப் பட்டிருக்கிறது. கெளவி புருசன் - இயல்பான வசனம்.

நல்ல படம் - பார்க்க வேண்டிய படம் - பசங்க பசங்க தான்

செல்வி ஷங்கர்

அழகர் வந்தார் !!

2009-05-09T08:28:00.003+05:30

மதுரை சித்திரைத் திருவிழாவினை முன்னிட்டு கள்ளழகர் வைகையாற்றில் இன்று ( 09.05.2009) சனிக்கிழமை காலை 8 மணி அளவில் எழுந்தருளினார்.
------------------------------------------------------------------------------

அன்னை மீனாட்சி
அன்று வந்த
வழியெல்லாம் இன்று
அழகர் வந்தார் !

வாராரு வாராரு !
அழகர் வாராரு !
என்று
ஆடிப் பாடும்
மக்கள் ஒருபால் !

கற்பூரம் கரைகின்ற
சர்க்கரையில் மனம்
சாந்தமாய் கண்
நோக்க ! கைகூப்பும்
ம்க்கள் ஒருபால்!

விண்ணதிர மண்ணதிர
கொட்டி முழக்கி !
குரல் எழுப்பி !
கைகால் கரகமாட
கண்களிலே அழகர் !

தங்கக் குதிரை
தகதகக்க ! எங்கள்
மனம் கலகலக்க
கள்ளழகர் வாராரு !
அலை அலையாய்
மலை மலையாய்
மக்கள் வெள்ளம் !

மாடவீதி
வழி மறைக்க
மற்றுமொரு
வைகையென
வளமான
வாழ் வெள்ளம் !
வழியெல்லாம்
வானோரே
வந்ததென !

மழலை யெல்லாம்
மக்கள் தோளில் !
மன மெல்லாம்
மாலவன் தன்
மா வடிவில் !
மதுரை யெல்லாம்
மீன் விழியாள்
அருள் வெள்ளம் !

செல்வி ஷங்கர்
--------------------

அதுதான் இயற்கை !!

2009-05-08T20:20:00.002+05:30

சித்திரை நிலவென்
சிந்தனை கலைத்தது !

சன்னல் திரையை
சற்றே விலக்கி
எட்டிப் பார்த்தது !

எப்படி இந்த
ஒளி மின்னல்
ஓவியம் வரைந்தது
போல் வந்தது !

காற்று வரும்
வழியே நேற்று
வந்தது தானே
என்று நினைத்தேன் !

பார்வையில் பட்டதும்
பாசப் புன்னகை
பூத்தது ! வான்பூ !

ஆம் !

அன்றும் இன்றும்
அதே நிலவுதான் !
ஆனாலும் அதுபுதுமை !
அதுதான் இயற்கை !

பட்டாம் பூச்சி

2009-05-01T16:06:00.000+05:30

எப்போதாவது எட்டிப்பார்க்கின்ற எனக்கு பட்டுப்போன்ற பட்டாம்பூச்சி விருதா என்று வியந்தேன். சரி சரி யாராவது பாராட்டினால் ஏன் பதுங்க வேண்டும், பட்டாம் பூச்சி போல் சிறகடித்துப் பறப்போமே என்று மகிழ்ந்தேன் !

மென்மையான சிறகுகள் - வண்ண வண்ணக் கோலங்கள் - யார் வரைந்து வைத்தது அதன் முதுகில் என்று நான் வியந்ததுண்டு. கூட்டுப்புழு குளிர்ந்த வண்ணத்தில் சிறகு முளைத்து வெளிவரும் முயற்சியை நான் நம்பிக்கை மொழிகளாய் நினைத்ததுண்டு. நம்பிக்கை தானே நம் வெற்றி.

வெற்றியையும் பாராட்டையும் பகிர்ந்து கொள்வது தானே பசுமைத் தமிழின் பாங்கு. அப்பாங்கை தமிழ் அன்பர்களுடன் பகிர்ந்து கொள்கிறேன். நான் பெற்ற இன்பம் பெறுக வையகம்.

எனக்கு இப்பெருமையை அளித்த தோழி மதுமிதாவிற்கு வாழ்த்துகள் -பாராட்டுகள்.

இப்பொழுது தொடர் செயலாக பட்டாம்பூச்சி விருதினை அருமைத்தோழிகள் - நானானி- துளசி மற்றும் பாசமலர் ஆகிய மூவர்க்கும் வழங்குகிறேன். மகிழ்ச்சி அடைகிறேன்.

இந்த மூன்று பதிவர்களின் இடுகைகள் பலவற்றை எனக்குக் கற்றுத் தந்திருக்கின்றன. துளசி பார்க்காத துறையே இல்லை. நானானி நன்றாகச் சிந்தித்தூ சிறு கருத்தைக் கூட செம்மையாய்ப் பாதியும் திறமை வாய்ந்தவர். பாசமலர் பன்மொழிச் சிறப்புடன் பதிவுகள் தருபவர். கவிதைகள் எம்மொழியிலும் கரையைத் தொடும்.

விருது பெற்ற மூவருக்கும் பாராட்டுகள் - நல்வாழ்த்துகள்

விதி முறைகள் :

இந்த விருது - ஒலிம்பிக் ஜோதியை எடுத்துக்கிட்டு போறது போல - அதனால, பின்பற்றவேண்டிய சில விதி முறைகள்:

1. இந்த பட்டாம்பூச்சி இலச்சினை உங்கள் பதிவு பக்கத்தில் இருக்க வேண்டும் (Put the logo on your blog)

2. உங்களுக்கு விருது கொடுத்த நபரின் இணையதள முகவரிக்கு ஒரு இணைப்பு கொடுக்க வேண்டும் (Add a link to the person who awarded you)

3. மூன்று அல்லது அதற்கு மேலான பதிவர்களைத் தேர்வு செய்ய வேண்டும் (Nominate at least 3 other blogs)

4. தேர்வுசெய்யப்பட்ட பதிவுகளிற்கு உங்கள் பதிவில் இருந்து இணைப்பு தர வேண்டும் (Add links to those blogs on yours)

5. நீங்கள் தேர்ந்தெடுத்த பதிவுகளில் அவர்களுக்கு இச்செய்தியை தெரிவிக்க வேண்டும் (Leave a message for your nominees on their blogs)அதனால மூணுபேருமே என்னைப்போல தாமதிக்காமல் பட்டாம்பூச்சி போல பறந்து பறந்து விருதைக் கொடுத்துடுங்க:)

வணக்கம்.

செல்வி ஷங்கர்

வரலாற்றைப் படைத்திடுவோம் !

2009-01-28T20:08:00.000+05:30

சுதந்திரம் என்பது என்ன ?
சுற்றித் திரிகின்ற மனம்
நின்று பார்ப்பது தானே !

கேட்பது எல்லாம் கேள்வி
என்றால் விடை அங்கே
விருப்பம் தானே !

ஓடுவதே நதி என்றால்
தேங்குவது ஒரு நாள்
தேடும் நீர் தானோ ?

வீழ்வது அருவி என்றால்
வீழ்ந்தோடும் நீரே
அழகான ஆறாகும்.

நினைப்பது மனமென்றால்
எண்ணங்கள் எங்கு செல்லும் ?
எங்கும் செல்லும் !

இயற்கையை வளமென்றால்
இன்பமெலாம் பரவி நிற்கும்.

பறப்பது நம் கொடி என்றால்
பாரெல்லாம் நாம் உயர்வோம் !

வளர்வது நாமென்றால்
உயர்வதும் நாம் தானே !

நாளும் உழைத்திட்டால்
உண்மை சுதந்திரம்
நமதாகும் .

உயரும் நாட்டை
உயர்த்துவோம் !

உண்மை உழைப்பால்
நன்மைகள் சேர்ப்போம் !
நலம் பல காண
நாளும் உழைப்போம் !

வகுக்கின்ற திட்டங்கள்
வளமாகும் நாட்டில் !

உகுக்கின்ற உழைப்பெல்லாம்
உயர்வாகும் உலகில் !

நித்தம் நினைக்கின்ற
சத்தம் எல்லாம்
சத்தியமாய் சாதிக்கும் !

ஏற்றம் பல காண
ஏங்கும் மக்கள் !
ஒற்றுமையை உணர்கின்ற
காலமன்றோ நாட்டின் வளர்ச்சி !
நம்மை நாம் வகுக்கின்ற
நாட்டத்தில் காண்போம் நாட்டை !

நன்மைகளை உண்மைகளை
உயர்வாகக் கொள்வோம் !
உழைப்பாலே இந்நாட்டை
உயர்த்திடுவோம் !
வருங்காலம் வளமாக
வரலாற்றைப் படைத்திடுவோம் !

செல்வி ஷங்கர்
---------------------

மனப்போராட்டம்

2009-01-08T19:32:00.000+05:30

எப்படி இருந்த நாடு
ஏன் இப்படி ஆயிற்று ?

இதற்கு யார் காரணம் ?
இப்படியே போனால் இது
எங்கே போய் நிற்கும் ?

போட்டிகளும் போராட்டங்களும்
எதைச் சொல்கின்றன நமக்கு ?

யாரவது தட்டிக்
கேட்க முடிகிறதா ?
கேட்டால் என்னவாகும் ?
எப்படியும் இன்னிலை
மாறுமா ? அப்படிஎன்றால்
அது யாரால் முடியும் ?

மாற்றங்கள் மறுபடியும்
மறுபடியும் வருகின்றன !
ஆனால் மாறுகின்றோமா ?

நினைத்துப் பார்த்தால்
இது எப்படி முடியும் ?
என்று தான் தோன்றுகிறது.

வருங்காலம் நினைக்குமா ?
இல்லை நிகழ்காலம்
நிகழ்த்துமா ? கடந்தகாலங்கள்
நமக்குச் சொல்லிய
பாடம் என்ன ?

படித்தேன் ஒரு கவிஞனின்
கடந்த காலத்தை
அவனும் புலம்போ
புலம்பென்றுதான்
புலம்பி இருக்கிறான் !

அவனுக்கு முந்தைய
கவிஞனின் காலத்தையும்
புரட்டிப் பார்த்தேன் !
அவனும் போராடிப்
போராடி வாழ்நாளின்
பாதியிலேயே பாருலகை
விட்டுப் பறந்து
விட்டான் ! பாருலகம்
பார்த்து வியக்கின்ற
நாட்டிலே நடப்பதுதான்
புரியவில்லை நமக்கு !

பார் போற்றுமா ?
இல்லை பாரதத்தை
பாருயரும் பாதையிலே
பரிதவிக்க விட்டுவிடுமா ?

மனிதனே ! மனிதனே !
மனத்தால் நினை !
தன்னைப் போன்றது
தரணி என்று ! தன்னால்
உயரும் தாய்நாடு !
இதுவும் என் மனப் போராட்டம் !
---------------------------------------------
தினசரி செய்தித்தாள்களைப் பார்க்கும் போது
மனத்தில் ஏற்பட்ட எண்ணம் ........
----------------------------------------------
செல்வி ஷங்கர்

இயற்கை மாற்றம் .......... !

2008-12-27T19:38:00.000+05:30

மாலைக் கதிரவனே !
அப்படி என்ன மகிழ்ச்சி ?
மார்கழி மாலையில்
மகிழ்வாய்த் தோன்றுகிறாய் !

வட்டமிட்டு வரைந்தாற்போல்
கார்மேகக் கூட்டத்தில்
கலைநயமாய்க் காண்கின்றாய் !

செக்கச் சிவந்த
செந்தனலாய் ! சிதறாமல்
அள்ளி வைத்த தீப்பந்தாய் !
விரிந்த வானத்தின்
வீதிகள் நடுவே
திட்டமிட்டு இட்ட
திலகமே நீ !

கட்டிடச் சுவரில்
காக்கைப் பள்ளிக்கூடம் !
கலைந்த மேகங்கள் !
களையாக நடுவில் நீ !
கரும் பச்சை இலைகள் !
காற்றில் சலசலக்கும்
தென்னங்கீற்றுகள் !
கவின் மாலைப் பொழுதின்
காவியமாய் நீ !
மலைகளின் மடியில்
மகிழ் வட்டம் !

பனிக்காற்று பார்வை பட்டு
பரவசமாய்ப் பறவைக் கூட்டம் !
கூட்டுக்குச் செல்லும் குதூகலத்தில்
வரிக்கோடாய் வானில்
சிறகடித்துச் சிலிர்க்கும்
சின்னஞ்சிறு பறவைகள் !

தீர்க்கமாய்ப் பார்க்கின்ற
பார்வையில் பரவசமாய்
பரந்து கிடக்கும் இயற்கை !
பருவ மழையின் பசுமை !

எப்படி நிகழ்ந்தது ?
எப்படி நிகழ்ந்தது !
இந்த இயற்கையின் மாற்றம் !
----------------------------
செல்வி ஷங்கர்
----------------------------

பாடம் படிக்குமா உலகம் ?

2008-12-17T21:50:00.000+05:30

உதித்தான் கதிரவன் கிழக்கில்
உயிர்த்தெழுந்தது உலகம் !
ஒளியைப் பதித்தான் எங்கும்
விழியைப் பெற்றது உலகு !
வளியை வளைத்தது வானம் !
வனத்தை வளர்த்தது உன்னொளி !
வானம் எங்கும் ஊர்ந்தாய் !
மானம் காக்க மனிதன்
மாண்புறு தொழில் செய்தான்.
உதய சூரியனே நீ
நாளும் உதிக்கின்றாய் !
உன்னத உலகை
ஒளியால் படைக்கின்றாய் !
உன்னை யார் கேட்டார்
உதியென்று ?
ஒழுங்காய் ஒளி பரப்ப
யார் பணித்தார் ?
ஏனென்று கேட்பார்
இல்லையே ! இருந்தும்
செய்கின்றாய் கடமையை !
நேரத்தில் செய்கின்றாய் !
காலத்தில் சிறக்கின்றாய் !
தட்டிக் கொடுப்பார் இல்லை !
தட்டிக் கேட்பார் இல்லை !
தானே செய்கின்றாய் !
சரியாய்ச் செய்கின்றாய் !
உலகம் படிக்குமா பாடம் உன்னிடம் !!!

தென்றல் புயலாய் மாறியதேனோ ??????

2008-12-16T22:25:00.000+05:30

மழையில் குடையாய்
வெயிலில் நிழலாய்
நினைவில் நிகழ்வாய்
சோதனையில் வழியாய்
சாதனையில் மகிழ்வாய்
போதனையில் பொறுப்பாய்
பாதையில் பலமாய்
தேவையில் நினைவாய்
செயலில் பொருளாய்
ஆற்றிய கடமை
அருமை மக்களாய்
அவிழரும்பானதே !

மணக்கும் மணத்தை
மலரில் அடக்கிய
மலர்ப்பந்தலாய்
மனத்தை மயக்கிய
மலர்களே !

மாற்றம் ஏனோ ?

மலர்களே ! மலர்களே!

குற்றம் பார்க்கின்
சுற்றம் இல்லை !

சிறியோர் எல்லாம்
சிறியரும் அல்லர் !
பெரியோர் எல்லாம்
பெரியரும் அல்லர் !
செயலால் உயர்க !
செல்வங்களே !!
-----------------------------------------

செல்வி ஷங்கர்

ஓய்வு !

2008-12-13T23:38:00.001+05:30

கஞ்சி குடித்த
களைப்பில்
கட்டாந்தரையில்
தூக்கம் !
மடித்த கையே
தலையணை !
கண்ணில் உறக்கம்
கடல்போல் !
காத்திருந்தது
கட்டட வேலை !

ஒரு மழைக்கால மாலை !!!

2008-12-12T21:40:00.000+05:30

ஒரு மழைக்கால மாலைப் பொழுதில், எங்கள் வீட்டு மொட்டை மாடியில் நின்று சுற்று முற்றும் பார்த்த போது மனத்தில் தோன்றிய கவிதை.

ஒரு பக்கம் - மதுரை மீனாட்சி அம்மன் கோவில் கோபுரங்கள்
மறு பக்கம் வைகையாற்றுப் பாலம்
இடையே எங்கள் அடுக்கு மாடிக் கட்டடங்கள்

நான்காம் மாடியில் நடந்த கட்டட வேலைக்கு
கீழ்த்தளத்திலிருந்த மணல் அனைத்தும் நொடியில்
மேலே கொண்டு செல்லப்பட்டது.

இவை அனைத்தையும் கண்ட கண்களின் காட்சி இது.
----------------------------------------------------------------------
சூழ்ந்த மேகங்கள்
தவழும் கோபுரங்கள்
சுற்றிலும் மரங்கள்
வீசிடும் காற்று
சுழன்றிடும் சூழல் !

பளிச்சென்ற கட்டிடங்கள்
பார்க்கவே அழகாய் !
கோடு போட்டாற்போல்
பாலம் ! அதிலே
புள்ளிகளாய் மக்கள் !
போகின்ற பேருந்துகள் !

கொட்டிக் கிடந்த
மணலெல்லாம்
குவியல் குவியலாய்
மாடித்தளத்தில் !
மனிதனின் உழைப்பு !

ஆற்றோரப் பாலம்
அங்கே வண்டிகளின்
பேரிரைச்சல் !

போவோர்
வருவோர்
எல்லாம்
ஓரத்தில் !
--------------------------------
செல்வி ஷங்கர்

குமுறும் நெஞ்சம் - சிதறும் கண்ணீர்

2008-11-29T20:48:00.000+05:30

இப்பதிவு இவ்வலைப்பூவினில் ஐம்பதாவது பதிவாக வெளி வருகிறது.
-------------------------------------------------------------------------------------------
அமைதிப் பூங்கா அதிர்கிறது !
அறிவியல் வளர்ச்சி சிதர்கிறது !
வளரும் நாட்டின் வளர்ச்சி
தீவரவாத சிந்தையின் சிதையில் !
கதறும் ஓலம் - தகரும் கட்டிடம் !
பற்றும் நெருப்பில் பரிதவிப்பு !
சுட்டு வீழும் உடல்கள் !
உலுக்கும் சீர்குலைவு !
கொதிக்கும் உள்ளம் !
குமுறும் நெஞ்சம் !
சிந்தும் கண்ணீர் !
ஏனிந்த அழிவு ?
எதற்கு இந்தக் குலைவு ?
குண்டு வெடிப்புகள் தருமா குவலயந்தன்னை ?
மடிபவன் மனிதன் !
மடியச் செய்பவன் மனிதன் !
உயிரைக் கொன்று
உடைமைகள் அழித்தால்
உயர்வு வருமா ?
உள்ளம் நிலைக்குமா ?
மனித நேயம் மடியலாமா மண்ணில் ?
ஒருவன் வளர்ச்சி மற்றவன் அழிவிலா ?
சிந்தித்தால் சிந்தை குலையுமே !
யார் புகட்டுவது அன்பு மனப்பான்மையை ?
வன்னெஞ்சங்களே - வாழ விடுங்கள் வையத்தை !!!
--------------------------------------------------------------

எண்ணங்கள் - வடிவங்கள்

2008-11-23T18:35:00.000+05:30

இறை :
----------
இறைவா வா
குறைவே போ
நிறைவே எங்கும் !
---------------------------------

இடம் :
-----------
வீடு நிறைய
பொருள்கள் !
மனத்தில்
ஏனோ
வெற்றிடம் !
----------------------------------

பொருள் :
---------------
ஓடியபோது
ஒன்றுமில்லை !
நாடியபோது
காணவில்லை !
தேடிய பின்னோ
தேவையில்லை !
---------------------------

ஆசை :
-----------
ஆடிப்பாட
ஆசை !
ஓடிஓடி
நின்றபின் !
----------------------------------

மழலை :
-------------
அடுக்கி வைத்த
பொம்மைகள்
அழகாக !
அழாத
குழந்தைகளாய் !
-----------------------------------

இயற்கை :
-------------
ஆற்று நீரே
அடுக்கு மாடி
கழிவு நீரோடை !
ஆற்றல் மிகு
மனிதா !
மாற்றவேண்டும்
நிலைமை !
-----------------------------------
செல்வி ஷங்கர்
-----------------------------------

ஒரு கருத்து !

2008-11-20T08:29:00.000+05:30

உதிக்கின்ற சூரியனும்
கிழக்கில் !

உண்கின்ற உணவும்
உழைப்பில் !

வருகின்ற அனைத்தும்
வாழ்வில் !

செல்வி ஷங்கர்
------------------------

மனக் குரல் - எண்ணக் குறள் - 2

2008-11-16T15:08:00.001+05:30

செய்தல் நலத்தினை இல்லெனில் யாதொன்றும்
செய்யா திருத்தல் நலம்.

உற்ற துரைத்தல் உவப்பெனில் மற்றது
கற்றலும் கல்லாமை தான்

பெற்றது போற்றி பெரும்பொருள் ஈயின்
இழந்தது தானே வரும்

கற்றது நீங்கின் கவினுலகில் மற்றதென் ?
உற்றது போற்றி வளர்.

போராடிப் பெற்றதெலாம் பூமியில் என்றுமே
மாறாது நிற்பது காண்.

நீரைப் பிடிக்க நிலவைப் பிடிக்கும்
மனிதா ! நிலத்தை மதி.

வியர்க்கும் நிலையில் நிழலை நினையும்
மனமே ! மரத்தை நடு.

வெந்து தணிந்த நிலமெலாம் நீர்சொரிய
வந்து குளிருமா வான்.

-------------------------------
செல்வி ஷங்கர்
-------------------------------

வாழ்ந்து பார்க்க ........

2008-11-09T15:12:00.000+05:30

அவளுக்கு வீடுதான் உலகம் !
வீதிகள் எல்லாம் பாலங்கள் !
அவள் வெளிஉலகை எட்டிப்பார்க்க !

அவளுக்குப் பிள்ளைகள்தான் எதிர்காலம் !
பேசும் சித்திரங்கள் பெருமைப்பட !

அவளுக்குக் கடமைதான் காவல் !
மூச்சுவிட மறக்காத முயற்சி !

அவளுக்கு அன்புதான் செல்வம் !
அனைவருக்கும் அள்ளிக்கொடுக்க !

அவளுக்கு அவன்தான் அனைத்தும் !
அரவணைக்கும் ஆக்கச் செயலில் !

அவளுக்கு அவளேதான் வரலாறு !
வாழ்ந்து பார்க்க ! வளர்த்துப் பார்க்க !!

எத்தனை பெரிது உலகம் ?

2008-11-02T15:43:00.000+05:30

என்ன செய்கிறாள் என்னவள் ?

இந்தக் கோட்டையைப் பிடித்து விடுவாளா ?

இல்லை சிகரம் தொட்டு விடுவாளா சின்னவள் ?

எத்தனை பெரிது உலகம் ?

என் கைக் குட்டிக் கரடியை விடவா !

இந்தப் பலகையில் அடக்கவா

அத்தனைக் காட்சியையும் .......... !

நான் எழுதிய எழுத்துகள்

என் பெயரின் பதிவுகள் !

இவைதானா இந்த மொழி !

இதில் தானா இத்தனை படைப்புகள் !

என் கண்களுக்குள் கருத்தாய்ச் சென்று

என் மனத்திரையில் மதியாய்ப் பரவி

நான் வடிக்கும் மழலைக்குள் மகிழ்வாய்

வரை கோடாய் வந்ததே இப்பலகையில் !

செல்வி ஷங்கர் : எங்களுடைய செல்லப் பேத்தி முதன்முதலாய் அவள் பெயரை எழுதிய பலகை

வளர்ச்சி என்பது வயதா ?

2008-10-25T21:57:00.000+05:30

ஐந்து வயதில் ஆர்வம் இருந்தது
பத்து வயதில் பயம் வந்தது
பருவ வயதில் பதட்டம் எட்டிப்பார்த்தது
படிக்கின்ற வயதில் எதிர்காலமே
எண்ணத்தில் மிதந்து சென்றது !
போராடும் போட்டி உலகில்
நீந்தவே பொழுதுகள் சாய்ந்தன
வளர்ச்சி என்பது வயதா ?
இல்லை !
தோற்றத்தின் மாற்றமா ?
சூழ்நிலை புரிந்தது ! சுற்றமும்
நட்பும் விரிந்தது ! நினைவுகள்
நிழலாகின ! கட்டிப்போட்டால்
சுற்றுகின்ற காளைபோல்
கால்கள் கட்டுத்தறியில் !
வட்டத்துக்குள் சுற்றுகின்ற
வண்டியாயிற்று வாழ்க்கை !
ஆனாலும் அதிலோர் சுவை !
சுமைகள் எளிதானால் சுகந்தானே !
சுமையின்றிச் சுற்றும் உலகில்லை !
சுமக்க மறுப்பவர் எவரேனும் உளரோ ?

செல்வி ஷங்கர்

வள்ளுவம் வாழ்வின் வழிகாட்டி !

2008-10-21T07:38:00.000+05:30

மாநில அளவில் ஸ்ரீராம் சிட்பண்ட்ஸ் நடத்திய பாரதி - வள்ளுவர் விழாவின் தொடர்பாக நடந்த பேச்சுப் போட்டியில் மாநிலத்திலேயே முதல் மாணவியாக தேர்ந்தெடுக்கப்பட்டு, முன்னாள் குடியரசுத் தலைவர் திரு ஆர்.வெங்கட்ராமன் அவர்களிடம், பள்ளிக்கான சுழற் கேடயமும், போட்டியாளர்க்கான பண முடிப்பும், பெற்ற என் செல்ல மகளின் பேச்சு. ( 1993)
-----------------------------------------------------------------------------------------------
நடுவர் உள்ளிட்ட அவையினரை வணங்கி மகிழ்கிறேன்.

இந்த உலகத்தில் எந்த ஒரு மனிதனும் எதையும் எளிதில் வேதம் என்று ஒத்துக் கொள்ள மாட்டான். ஆனால் உலகம் முழுவதும் ஒன்றை பொது மறையாக ஏற்றுக் கொண்டுள்ளதென்றால் உண்மையில் அந்த மனிதனின் சிந்தனை பாராட்டுக்குரியதே ! பாயில் படுத்து நோயில் விழும் மனித வாழ்க்கையில் இன்பங்கள் சேர்க்கவும் துன்பங்கள் நீக்கவும் துணை புரிவது வள்ளுவமே ஆகும். உண்மையில் அந்நூல் வாழ்வின் வழி காட்டியே !

மனிதனாகப் பிறந்தவன், அன்போடு வாழ வேண்டும் ! அறிவோடு திகழ வேண்டும் ! பகுத்தறிவோடு பழக வேண்டும் ! பண்பில் உயர வேண்டும் ! புனிதனாய் மாற வேண்டும் ! வாழ்வில் உயர்வதற்கு இவை மட்டும் போதாது - அவன் உண்மையைப் பேச வேண்டும் ; பொய்மையை நீக்க வேண்டும் ; நட்பில் உயர வேண்டும் ; நல்லதைக் கொள்ள வேண்டும் ; அல்லதைத் தவிர்க்க வேண்டும் ; வையத்து வாழ்வாங்கு வாழ வேண்டும் !

இன்றைய சமுதாயத்தில் மனிதன் அன்பின்றி, அறிவின்றி, நட்பின்றி, நேர்மையின்றி, நன்னெறியின்றி, வாழும் முறை தவறி, வழி காட்டும் துணையின்றித் தட்டுத் தடுமாறுகின்றான். அதற்கு வள்ளுவம் காட்டும் வழி தான் என்ன ?

அன்பாயிரு - அதற்காக நீ வருந்த வேண்டியதில்லை !
இன்சொல் பேசு - இதற்காக உன் நா துன்பப்படுவதில்லை !
பொறுமையாயிரு - அது உன்னைப் பொன் போல் உயர்த்தும் !
எதிரியை எளிதில் நம்பி விடாதே !
பகைவனின் கண்ணீரைப் பார்த்து பக்கம் சாய்ந்து விடாதே !
வணங்கும் கைகளுக்குள் வாளும் மறைந்திருக்கும் !
சொல் வேறு செயல் வேறு பட்டார் தொடர்பு கொள்ளாதே !
அது கனவிலும் இன்னாது !
வலிமை அறியாது வாள் வீசாதே -அது உன்னையே வீழ்த்தி விடும் !
கூற்றத்தைக் கைதட்டி அழைத்து ஆக்கத்தை இழக்காதே !
அன்பில் உயர்ந்து நில் !
என்பும் பிறர்க்கென்று சொல் !
வெற்றுடலாய் நடமாடி வேடிக்கைப் பொருளாகி விடாதே !
என்றெல்லாம் வள்ளுவம் காட்டும் வழி நாம் வாழ்வில் உயர
நல் வழியே !

அடுத்து அறிவு ! அது அற்றங்காக்கும் கருவி ! பகைவராலும் உள்ளழிக்கலாக அரண் என்று வள்ளுவர் அதற்குத் தரும் விளக்கம் அழகானது ! எப்பொருள் எத்தன்மைத் தாயினும், அப்பொருள் மெய்ப்பொருள் காண்பதறிவு ! எதிரதாக் காக்கும் அறிவினார்க்கில்லை அதிர வருவதோர் நோய் - என்பதெல்லாம் அறிவிற்கு வள்ளுவர் தரும் முடிவு !

சிந்தித்துச் செயல்படு ! வருமுன்னர் காவாதான் வாழ்க்கை எரிமுன்னர் வைத்தூறு போலக் கெடும் ! அதனால் வெள்ளம் வருமுன் அணை போடு ! என்று அவர் நம் வாழ்க்கைக்குத் தரும் எச்சரிக்கை - நல்வாழ்வுப் பாதைக்கோர் பச்சை விளக்கு ! இன்னும் அவர் கூறும் வாழ்க்கை விளக்கங்கள் நம்மை எல்லாம் மெய் சில்ர்க்க வைக்கின்றன !

கற்றதைச் சொல்லாதவன் காகிதப்பூ ! அறிவில்லாதவனின் அழகு மண்ணால் செய்த மாண்புறு பாவை ! கற்றறிவின்றி ஆன்றோர் அவைபுகல் எல்லைக் கோடின்றி விளையாடும் விளையாட்டு ! கற்றிருந்தால் நீ மனிதன் ! இல்லையெனில் விலங்கு ! நெஞ்சுரம் இருந்தால் நீ மனிதன் ! இல்லையெனில் மரம். இப்படி அவர் அறியாமையைச் சாடி அறிவைப் புகட்டி வாழ்வுக்குத் தரும் விளக்கம் - அது மனித வாழ்க்கைக்கோர் கலங்கரை விளக்கம் !

அடுத்து அன்பு - அது வாழ்க்கைக்கு அடிப்படைத் தேவை. அந்த அன்பில்லாதாவன் என்புதோல் போர்த்திய விலங்கு ! அவனால் பயன் ஒன்றுமில்லை ! மனிதனின் அன்பு விருந்தினை மென்மையாக நோக்க வேண்டும் ! அது உலகத்தோடு ஒட்டி உறவாட உதவ வேண்டும் ! உள்ளத்தே பொங்கி எழும் சினத்தை அடக்க வேண்டும் ! இன்னா செய்தார்க்கும் இனியவே செய்தல் வேண்டும் ! இன்பத்துள் இன்பம் விழையாது துன்பத்துள் துன்பம் துடைக்க வேண்டும் ! அன்பால் ஆண்டவனைப் பணிய வேண்டும் ! அவன் ஆதி பகவன் ! அறவாழி அந்தணன் என்று அவர் ஆன்மீகத்திற்குத் தரும் விளக்கம் ஒன்றே போதும் அவர் சாதிச் சளுக்கறுக்கும் சான்றோர் என்பதற்கு ! சமயப் பிணக்கறுக்கும் ஆன்றோர் என்பதற்கு ! இதை விடச் சிறந்த வாழ்க்கை வழிகாட்டி வேறென்ன இருக்க முடியும் !

மனித வாழ்க்கையில் கொடுத்து வாழும் பண்பு உயர்வானது ! எனவே உன்னால் முடிந்தால் கொடு ! இல்லை எனில் அடுத்தவன் கொடுப்பதைத் தடுக்காதே ! அது பாவம் ! அந்தப் பாவம் தீர்க்க வழியே இல்லை !

சினம் கொள்ளாதே !
அது சேர்ந்தாரைக் கொல்லும் !
அறம் செய்ய நீ ஆன்றோனாக வேண்டாம் !
மனத்துக்கண் மாசிலனாகு - அது போதும் !
கொல்லா நலத்தது நோன்பு !
பிறர் தீமை சொல்லா நலத்தது சால்பு !
எதையும் ஏற்றுக் கொள் !
தோல்விகள் இயற்கை !
எவரிடமும் கை ஏந்தாதே - அது இழிவு !
முடியாதென்று முடங்கிக் கிடக்காதே !
தக்க காலமும் இடமும் அறிந்து செயல்படு - இந்த உலகத்தையே உன்னால் பெற முடியும் !

இதனை இதனான் இவன் முடிக்கும் என்றாய்ந்து அதனை அவன் கண் விடு !
தேரான் தெளிவும் தெளிந்தான் கண் ஐயுறவும் தீரா இடும்பை தரும் !
எனைவகையான் தேரியக் கண்ணும் வினைவகையான் வேறாகும் மாந்தர் பலர் !

சிந்தித்துச் செயலாற்று !
ஒழுக்கம் தவறாதே !
சொன்ன சொல் பிறழாதே !
அன்பாயிரு !
அறிவாயிரு !
பண்பாயிரு !
வெற்றி கொள் !
வேடந்தவிர் !
செய்தொழில் போற்று !
சோம்பலை அகற்று !
கொடுத்து வாழ் !
கெடுத்து வாழாதே !
உண்மை பேசு !
உயர்ந்து வாழ் !
அச்சமே கீழ்களது ஆசாரம் !
தன்மானம் இழக்காதே !
தன்னிலையில் தாழாதே !
தாழ்வு வந்துழி உயிர் வாழாதே !
வறுமையை நினைத்து துவளாதே !
வாய்ப்புகள் இருக்கு தயங்காதே !

இப்படி எல்லாம் வள்ளுவன் காட்டும் வழி என்னை எங்கேயோ இழுத்துச் செல்கின்றது !

நீ ஒராண்டு திட்டமிட்டால் தானியங்களை விதை !
நீ பத்தாண்டுகள் திட்டமிட்டால் மரங்களை நடு !
நீ நூறாண்டுகள் திட்டமிட்டால் மனிதர்களை உருவாக்கு !

என்றான் ஓர் அறிஞன். ஆனால் வள்ளுவனோ ஆயிரம் ஆண்டுகள் திட்டமிட்டு ஆன்றோர்களை அல்லவா உருவாக்கி உள்ளான். அதனால் தான் அவன் தெய்வப்புலவன் திருவள்ளுவன். அவன் வள்ளுவமும் குன்றின் மேலிட்ட விளக்கு ! இந்தக் குன்றின் மேலிட்ட விளக்குக்கு நம் குவலயமே சாட்சி ! இந்த ஒரு மாட்சிமை போதாதா தெய்வப் புலவரின் திருவள்ளுவத்திற்கு !

வாருங்கள் தீபத்தை ஏற்றுவோம் !

திருக்குறள் போற்றுவோம் !

உள்ளிருள் நீக்குவோம் !

வருகிறேன் !
வாய்ப்பிற்கு நன்றி !
வணக்கம் !
--------------------------------------------------------
ஆக்கம் : செல்வி ஷங்கர்

--------------------------------------------------------

ஒலி வடிவம் :

---------------------------------------------------------

செல்வி ஷங்கர்

சுமைகள் வேண்டாம் !

2008-10-20T21:54:00.000+05:30

அருமைத் தோழி கயல்விழி முத்துலெட்சுமி என்னை ஒரு கதை - குறளின் அடிப்படையில் - எழுத அழைத்தார். அதன்படி இச்சிறு கதை ......

வேகமாகச் சென்று கொண்டிருந்த ராமு சற்றே மர நிழலில் ஒதுங்கினான். ஏதோ சிந்தனையில் வானத்தை நிமிர்ந்து பார்த்தான். வெயிலுமில்லை - மழையுமில்லை. ஆனால் காற்று வர மறுக்கின்ற ஒரு புழுக்கமான சூழ்நிலை. மனத்தின் இறுக்கமும் பெருமூச்சாய் வெளி வர, அந்தப் பேருந்து நிறுத்தத்தில், சிமிண்டாலான இருக்கையில் அமர்ந்தான்.

சுற்றுமுற்றும் கண்களை சுழல விட்டான். எல்லாரும் ஏதோ ஒரு வேகத்தில் பேருந்தில் ஏறுவதும் இறங்குவதுமாய் அந்தச் சாலை இயங்கிக் கொண்டிருந்தது. அதே நேரத்தில் இராமுவின் மனமும் அசை போட்டுக்கொண்டே, அடுத்து தான் செல்ல வேண்டிய பேருந்தின் வருகைக்காகக் காத்துக் கொண்டிருந்தது.

ஆம் ! எப்படியாவது சொன்னதைச் செய்து விட வேண்டும் - ஒரு நாள் போல் நாளை பார்க்கலாம் ! அப்புறம் பார்க்கலாம் ! அவசரப் பட வேண்டாம் ! என்று எண்ணிக் கொண்டே வீட்டு வேலைகளை தள்ளிப் போட்டுக் கொண்டே போவது போதும். யார் தான் வீட்டில் இதை பொறுத்துக் கொள்வார்கள் ? ஒரு நாளா ? இரண்டு நாளா ? தினமூம் இப்படித்தான். பொறுமைக்கும் ஒரு அளவு வேண்டாமா ?

பிள்ளைகளூம் பேசாமலே எல்லா வேலைகளையும் செய்து கொண்டிருந்தனர். ஏனோ ராமுவிற்கு வெளி வேலைகளில் இருந்த ஈடுபாடு வீட்டு வேலைகளில் அவ்வளவாக இல்லை. வீடும் நம்முடையது தானே ! அந்தந்த வேலைகளை அவ்வப்போதே செய்வோமே என்ற எண்ணம் மட்டும் எப்படியோ அவனுக்கு மறந்து போய் விடுகிறது. இதனால் அவ்வப்போது ஏறபடும் மனச்சுமையை அவன் சுமந்து தான் ஆக வேண்டி இருந்தது. வேலைகள் சுமையாகாமல் பார்த்துக் கொண்டால் நமக்குத் தானே நல்லது அப்பா ! என்று பிள்ளைகள் சொல்லியது இன்றைக்கென்னவோ ராமுவிற்கு பளிச்சென உறைத்தது ! அதனால் தான் வீட்டு வேலைகளைப் பார்க்க விரைந்து கொண்டிருக்கிறான் புத்துணர்வுடன்.

அதிகாரம் : தெரிந்து செயல் வகை

செய்தக்க அல்ல செயக்கெடும் செய்தக்க
செய்யாமை யானும் கெடும்.

விளக்கம் : செய்யக்கூடாத செயல்களைச் செய்வதால் கேடு வரும். செய்ய வேண்டிய செயல்களைச் செய்யாமல் இருப்பதாலும் கேடு வரும். எனவே எதனை எப்போது எப்படிச் செய்ய வேண்டும் என்று அறிந்து அதனை அப்போது அப்படியே செய்ய வேண்டும். செய்ல்களே வழிபாடல்லவா !

இப்பொழுது மூன்று பதிவர்களை நான் அழைக்க வேண்டுமாம். யாரை அழைப்பது - யாரை விடுவது ? வேண்டாம் இந்த விபரீத விளையாட்டு - விட்டு விடுகிறேன் பதிவர்களின் விருப்பத்திற்கு. யாரேனும் மூன்று பதிவர்கள் தொடரலாம். மறுமொழியில் விருப்பத்தைத் தெரிவித்தால் மகிழ்ச்சி அடைவேன்.

வருக ! வருக !! - கதைகள் தருக! தருக !!

விதிமுறைகள் : திருக்குறளின் கருத்தும் கதையின் கருத்தும் ஒன்றாக இருக்கவேண்டும். இன்னும் மூன்று பேரையாவது அழைத்து எழுத வைக்க வேண்டும்.

நல்வாழ்த்துகள்

செல்வி ஷங்கர்

மாற்றொலி

2008-10-09T20:20:00.000+05:30

சுற்றும் உலகம் நின்றால்
சுழலும் மானிடம் என்னாகும் ?
கற்கும் மாந்தர் காண்பது
தெற்கும் வடக்கும் திகழும்
திசையா ? நீந்தும் தீவா ?
சுற்றிச் சுற்றி வந்தாலும்
தட்டித் தட்டிப் பார்த்தாலும்
எட்டி எட்டிச் சென்றாலும்
எங்கும் திகழும் அமைதியே !
சுற்றும் கால்கள் ! சுழலும்
கண்கள் ! காண்பதெல்லாம்
அமைதி ! மின்னல்போலே
மின்னொளி மிளிரும் காலதர் !
மரங்கள் சூழ்ந்த மாடங்கள் !
நிழல்கள் அசையும் மாந்தர் !
காற்றில் மிதக்கும் பேச்சொலி !
கண்கள் நோக்கும் அமைதி !
கால்கள் தேடும் ஓய்வு !
மனமது நினைத்தால் ---------- !!

செல்வி ஷங்கர்

மனக் குரல் - எண்ணக் குறள்

2008-10-09T20:07:00.000+05:30

மனத்தில் தோன்றிய எண்ணங்களைக் குறளாய் வடித்திருக்கிறேன்.

கண்டும் உணர்ந்தும் கவிகள் பயில்வதே
என்றும் இளைஞர் நிலை.

அருகிருந்(து) ஆன்றசொல் பேசி விருந்தெதிர்
கொள்ளவே நாளும் நினை.

பாடம் படித்தே பலகலை போற்றிட
வேடம் தவிர்த்தே இரு.

சின்னக் குழந்தை சிரித்தே மகிழ்ந்திட
வண்ணக் கதைகள் உரை.

வளர்ந்த மரங்கள் மலர்ந்த செடிகள்
நிறைந்த வனமே நிலம்.

உண்மை உரைத்தே உவகை நிறைந்திட
நன்மைச் செயலே புரி.

செல்வி ஷங்கர்

யாருக்கில்லை சோகம் ? பூவிற்கில்லை வாசம் !

2008-08-11T21:44:00.000+05:30

தொட்டில் பிள்ளை
கட்டில் வந்தால்
துன்பம் !

எட்டிப் பார்க்கும்
வயதில் ஏக்கம்
வந்தால் துன்பம் !

தட்டிக் கதவை
தாண்டிப் பார்க்கும்
தழைத்த வயதில்
சோகம் !

முட்டி மோதி
முகத்தின் பொலிவில்
வளர்ந்த இளமை
வாசம் மலர
சோகம் !

சுற்றும் சூழல்
கற்ற கல்வி
கையில் உள்ள
காகிதப் பட்டம் !

ஏறி இறங்கும்
இளமை முறுக்கு !
ஏக்கம் ! தூக்கம் !
எட்டிப் பார்க்க
எடுத்து வைத்த
காலடிகள்!

கணக்குப் பார்க்கும்
காசுகள் ! கையை
விரிக்க ! கால்கள்
ஓடும் ஓட்டம் !

நினைத்துப் பார்த்த
கனவுகள் எல்லாம்
காலச் சக்கரம் !
நிலையாய் நிற்க.

மூச்சு வாங்கினால்
முக்கால் வயது
ஓடி விட்டது !
முதுமை மட்டுமே
கட்டி அணைக்க
காத்து நின்றது !

காகிதப் பட்டம்
கழனி வயலாய் !
கைகள் ஊன்றி
பயிரை வளர்த்தது !

பறவைகள் ! விலங்குகள் !
பார்த்து விரட்ட
பக்கம் ஆட்கள் !
பொத்திப் பொத்திப்
பொறுமை போனது !
ஆசை ! அன்பு !
உணர்வு ! உள்ளம் !
எல்லாம்
மூடிய கதவுகள் !

வளர்ந்த வயதும்
வாழப் பார்த்த
வடிவும் ! வடிகால்
தேட அலைந்த
பார்வையும் !

பாசம் வளர்த்தே
பகிர்ந்து கொள்ள
நட்பாய் ! உறவாய் !
யாரும் இல்லா
இயந்திர ஓட்டம் !

இரும்பைக் கூட
தட்டிப் பார்த்து
அடித்து நிமிர்த்தி
அடங்கும் வகையில்
சேர்க்கும் உலகம்
மனத்தை மட்டும்
மக்கள் இடையே
பாரா முகமாய்
ஓரம் கட்டி
ஒழிப்ப தேனோ ?

சுற்றி நிற்கும்
தொட்டால் சுருங்கி
உலகம் !
கட்டி வளைத்து
ஒரு கடிவாளம்
இட்டது !

உலகின் ஆசை
ஊரின் ஆசை
உறவின் ஆசை
எல்லாம் !
ஓசைப் படாமல்
ஒதுங்கிக் கொண்டது !

உலகம் என்பது
கூட்டிக் கழித்து
நீட்டி நிமிர்ந்து
ஒருகோடு கிழித்தது !
கிழித்த கோடு
கூடாய் அமைய
கொடி மரம்
அசைந்து
நிழலும்
காற்றும்
அங்கே சூழ்ந்தது !

குஞ்சுகள் இரண்டு
கொஞ்சி மகிழ
இயந்திர உலகம்
இளகி விரைந்தது !
கட்டம் கட்டி
கட்டுக்குள் வளைய
காவியம் படித்தது!
காலப் பறவை
பறந்தது ! இது தான்
இங்கேஉலகம் எவர்க்கும் !

செல்விஷங்கர் - 11.08.2008
----------------------------------

விரைவாய் வந்த வெண்பா !

2008-07-27T12:58:00.000+05:30

பாட்டெழுதும் நேரமா ? இங்கே பசுமரத்தின்
காய்கறிகள் காலத்தில் வேக ! கனிவான
நேரத்தில் காண்கின்ற காட்சிகள் கார்போல்
கவிதையாய் வந்தன காண் !
======================================
மலையான வாழ்வில் மனத்தின் நிழல்போல்
நிலையாத நீராய் நினைவிலே ஓடும் !
விலையான பொருளுக்கு வேர்போல் ஆகும் !
கலையாத காலைப் பொழுது !
==============================================
சொல்லாத சொல்லுக்கு நீதுணை ! ஏனடி ?
கல்லாக நின்றாய் ! கனிவாய்நான் பேசும்
முன்பாக ! கன்றுகள் கண்போல் உனையே
அன்பாகப் பார்த்த கால் !
====================================================
மனதுக்குள் மாய்கின்ற மானே ! முளைத்த
விதைதானே மேலும் கிளைத்தது ! ஏனோ
படர்ந்ததோர் பந்தலாய் பாய்விரிய சேய்கள்
மனம்பார்க்க பூத்தது ஏன் ?
=========================================
பாட்டெழுதும் நேரமா இங்கே ! பரிதவிக்கும்
கூட்டுக் குருவிகள் கூடியொன்றாய் ஆடி
மகிழ அழகான மேடை எதுவெனவே
தேடுவதைக் காண்மகளே காண் !
=================================

செல்வி ஷங்கர்

உலகம் மலரும் !

2008-07-22T06:30:00.000+05:30

நேற்றுப் பெய்த
மழைத் தூறல் !
சற்றே தழைத்த
ஈர மண் !
இயற்கை அளித்த
இன்பப் பரிசு !

அங்கும் இங்கும்
மேயும் ஆடுகள் !
அழகாய்ப் பறக்கும்
குருவிகள் ! ஆற்றின்
கரையில் கீரைப்
பாத்தி ! நீரோ
ஓடை நீர்தான் !
பாறைகள் தெரிய
செடிகள் முளைத்து
கொடிகள் படர்ந்த
பச்சைப் புல்வெளி !

நனைந்த சாரலில்
நிறைந்த நீர்மணல் !
காயும் வெய்யில்
சற்றே ஓய்ந்து
ஈரக் காற்றுடன்
இரவியின் கதிர்கள் !

காலில் செருப்பு
கையில் கொம்பு
தோளில் துண்டு
எண்ணெய் இன்றி
வறண்ட தலையை
கோதிய விரல்கள் !
கண்கள் சுருக்கி
காணும் கால்நடை
கையால் ஒதுக்கி
குனிந்து நடக்கும்
முதிர்ந்த மேய்ப்பான் !

ஏதோ இன்னும்
இயற்கையை நினையும்
ஈரப் புல்வெளி !
மாலை நேரம்
மேகம் மயங்கி
மரங்கள் அசைய
வீசிய காற்றில்
விண்ணில் இருந்து
ஓரிரு துளிகள் !

இதற்கே இத்தனை
ஈரம் என்றால்
சுற்றுச் சூழல்
காற்று ! மழைநீர்
மறித்துத் தேக்கி !
குப்பை கூளம்
கூர்ந்து அகற்றி !
தூரும் வாரி !
தூற்றிய மணலால்
கரைகள் உயர்த்தி !
கன்று மரங்கள்
கணக்காய் நட்டால்
நாடு செழிக்காதா ?

வெப்பக் காற்று
மறைந்து ! பூமி
குளிர்ந்து ! தூய
காற்று வீசாதா ?
பூமி வெப்பம்
தணியத் தணிய
தாரணி செழிக்காதா ?

மலையும் பனியும்
நகர்வது நின்றால்
நானிலம் அதிராதே !
ஆருயிர் அழியாதே !
காப்போம் காப்போம் !
இயற்கை காப்போம் !
உலகம் செழிக்க
உயர்ந்திடும் மரங்கள்
உவப்பாய் நடுவோம்!
உள்ளம் மகிழ்ந்தால்
உலகம் மலரும் !

செல்வி ஷங்கர் - 22082008

புதிய அறம் பாட வந்த அறிஞன்

2008-07-20T10:33:00.000+05:30

பாரதி !

பாதி வயதில் இப்பாருலகை விட்டுச் சென்றவன். அவன் இன்னும் மீதி வயதும் வாழ்ந்திருந்தால், இந்த பாரதத்திற்கு, வீதி அமைப்பதற்குக் கூட விதி வகுத்து விட்டுச் சென்றிருப்பான் ! அந்த செந்தமிழ்த் தேனீ சிந்துக்குத் தந்தையாய் மட்டும் வாழ்ந்துவிட வில்லை ! விதியே ! விதியே ! என் செய நினைத்தாய் தமிழச் சாதியை ? எவ்வகை விதித்தாய் ? என்று தட்டி எழுப்பி, உடலும் உள்ளமும் சோர்ந்தால் மருந்துண்டு; ஆனால் செய்கையும் சீலமும் குன்றினால் உயிர் வாழ வழியில்லை ! என்று நமக்குணர்த்தியவன். தனி அறம் பாட வந்த அறிஞன் இவன் ! புதிய திறம் பாட வந்த மறவன் இவன் !

நாமிருக்கும் நாடு நமது என்று கூட அறியாத மக்களின் மூட நம்பிக்கைகளைத் தகர்ந்தெறிந்தவன். அறியாமை இருளை ஓட்டிய பாரதி, நீடு துயில் நீக்கப் பாடி வந்த நிலா ! அரண்மனை அரியணையிலும், மாட மாளிகைகளின் பஞ்சணையிலும் தூங்கிக் கிடந்த தமிழ் மொழியை, சொல் புதிது ! சுவை புதிது ! சோதிமிக்க நவகவிதை! எந்நாளும் அழியாத மாகவிதை ! என்று தெருவெல்லாம் தமிழ் முழக்கம் செய்தவன். பைந்தமிழ்த் தேர்ப்பாகன் ! சிந்துக்குத் தந்தை ! செந்தமிழ்த் தேனீ !

சாதியின் பெயரால் சண்டையிட்டுக் கொண்டு, மண்டை உடைந்து, வீதிகளிலெல்லாம் கட்டிப்புரள்கின்ற நிலையை அவன் கண்டானில்லை. சமயச் சண்டைகளைப் போக்க அறம் ஒன்றே போதும் என்று நினைத்தவன். மண்டும் மதங்கள் அண்டா நெருப்பவன். அயலார் எதிர்ப்புக்கு அணையா விளக்கவன். சாதிப்படைக்கு மருந்தவன். நம் உள்ளத்தைத் தொட்டு, உணர்வுகளைத் தூண்டுகின்ற இந்த உண்மையை அன்றைக்கு அவன் ஒருவன் தான் துணிந்து கூறினான்.

" ஆத்தி சூடி இளம்பிறை அணிந்து
மோனத் திருக்கும் முழுவெண் மேனியான் !
கருநிறம் கொண்டு பாற்கடல் மிசைகிடப்போன் !
மகமது நபிக்கு மறையருள் வித்தோன் !
ஏசுவின் தந்தை ! எனப்பலரும் உருவகத்தாலே
உணர்ந்து உரைத்திடும் தெய்வம் ஒன்றே ! "

" பாருக்குள்ளே தெய்வம் ஒன்று - இதில்
பற்பல சண்டைகள் வேண்டாம் !"

என்று தெய்வ நீதி உரைத்தவன்.

இந்த நாட்டுக் கல்விக் கொள்கையின் மீது பாரதிக்கு இணையில்லாத ஈடுபாடுண்டு. கல்வியைத் தந்தால்தான் சமுதாயம் விழிப்புறும் என்பதில் நிலையாய் நின்றான். அதிலும் பெண் கல்வி கட்டாயமாக்கப் பட வேண்டும் என்றவன் நினைத்திருந்தான். எங்கேபெண் அஞ்சி அஞ்சியே வீட்டை விட்டு வெளியே வராமல் இருந்து விடுவாளோ என்ற அச்சம் பாரதிக்கு இருந்திருக்கிறது ! அதிலும் படிப்பது பாவம் என்ற சூழ்நிலையில் பெண் கல்வி அறிவு பெறாமல் போய் விடுவாளோ என்று கலங்கி இருக்கிறான் ! அவளுக்கு வாழ்க்கை உரிமைகள் இல்லாமல் நசுக்கப் பட்டு விடுவாளோ என்று ஏங்கி இருக்கிறான். அடுப்பூதும் பெண்களுக்கு படிப்பதெற்கு? என்ற காலத்தில் அவன் பெண்ணறம் பேசினான். பெண் முதலில் தந்தைக்கு அடிமை ! பின் கணவனுக்கு அடிமை ! பின் மக்களுக்கு அடிமை ! என்று உரிமைகள் மறுக்கப்பட்ட காலத்தில் " தாதரென்ற நிலைமை மாறி ஆண்களோடு பெண்களும் சரி நிகர் சமானமாய் வாழ்வம் இந்த நாட்டிலே ! " என்று பெண்ணுரிமை பேசினான்.

அறம் என்பது கடமை !
அறம் என்பது கற்பு !
அறம் என்பது வாழ்க்கை !
அறம் என்பது நீதி !
அறம் என்பது வேதம் !
இவை அத்தனையையும் இந்தச் சமுதாயத்திற்குத் தந்தவன்.

கடமைகளைச் செய்யாதவன் இங்கே வாழ்தல் கூடாது. வாழ்க்கையின் நிலை கற்புடையதாக இருத்தல் வேண்டும். கற்பென்பது பெண்ணுக்கு மட்டுமல்ல ; ஆணுக்கும் உண்டு ! சமுதாயத்தில் ஆணும் பெண்ணும் ஒழுக்க நெறி தவறாது வாழல் வேண்டும் என்று வாழ்க்கை அறம் பேசியவன். சமுதாயத்தில் நீதி தலை தூக்க வேண்டும்; அநீதியால் இழைக்கப்படும் கொடுமைகள் மறைய வேண்டும்; இல்லையெனில் தர்மத்தின் வாழ்வுதனை சூது கவ்வும்; தர்மம் மறுபடியும் வெல்லும் என்று நீதி அறம் உரைத்தவன் பாரதி !

சட்டத்தை சட்டைப்பைக்குள் போட்டுக் கொண்டு சாதாரண மக்களை சந்திக்கு இழுக்கும் நிலை கூடாது. சட்டத்தின் முன் அனைவரும் சமம். மக்கள் ஒருவரை ஒருவர் அடித்துக் கொண்டு சாகக்கூடாது. தம்பி சற்றே மெலிவானால் அண்ணன் தானடிமை கொள்ளலாமா ? செம்புக்கும் கொம்புக்கும் அஞ்சி மக்கள் சிற்றடிமைப் படலாமா ? என்று சமுதாய ஒழூக்கம் பேசியவன் பாரதி !

இப்படி தன் பேச்சிலும் மூச்சிலும் கனவிலும் நினைவிலும் நாடு நாடென்று சிந்தித்த பாரதி இந்த நாட்டை உயர்த்துவதற்கு தனி ஒரு அறம் பாடினான் ! தன்மானத்தினை இழந்து ஒருவன் அரச வாழ்வு வாழ்வதை அறவே அவன் வெறுத்திருக்கிறான். மண்ணில் இன்பங்களை விரும்பி சுதந்திரத்தின் மாண்பினை இழப்பரோ ? கண்ணிரண்டும் விற்றுச் சித்திரம் வாங்கினால் கை கொட்டிச் சிரியாரோ ? என்றான்.

வணக்கத்திற்குரியது தாய்நாடு ! அதை வணங்கு ! வாழ்த்து ! ஒற்றுமை கொள் ! என்பதே அவன் உரைத்த அரசியல் அறம் ! இது புதுமை இல்லையா ? இப்படி நாட்டின் எதிர்கால அரசியலைப் பற்றி நாட்டுப்பற்று உள்ள ஒரு உண்மைக் குடிமகனாக நின்று சிந்தித்த அவன் சிந்தனை போற்றுதற்குரியது அல்லவா ? !

செல்வி ஷங்கர் - 20082008

இமயப்பூவே இந்திரா !

2008-07-13T22:48:00.000+05:30

இவ்விரங்கற்பா இந்தியத் துணைக்கண்டத்தின் அன்றைய பிரதமர் திருமதி இந்திரா காந்தி மறைந்த போது, எழுதப்பட்டு, அகில இந்திய வானொலியில், சிறுவர் சோலையில் என் செல்ல மகளால் படிக்கப் பட்டது.
-------------------------------------------------
இமயப்பூவே இந்திரா !

இந்திய வரலாறு இந்திரா இல்லாமலா ?
எண்ணிப் பாரா இமயப்பூவே ! இந்திரா !
உன்னைப் பாரா இந்தியா ! இந்தியாவா ?
இத்தனை அமைதி ! இத்தனை அமைதி !
எங்கே உறங்குகின்றாய் ?

செந்நீர்ப் பெருக்கினை காணிக்கை ஆக்கினாய் !
ஏனெங்கள் கண்ணீர்ப் பூக்களைக் காணவா ?
நீ தீட்டாத திட்டமில்லை ! தீர்க்காத சிக்கலில்லை !
விதிக்காத சட்டமில்லை ! விலக்காத நீதியில்லை !
நின் நிகழ் காலத் திட்டங்கள் நிலையாய் உள்ளன !
அரசியல் வரலாற்றில் நீயொரு பொன்னேடு !
நின் பொன்னேட்டின் பக்கங்கள் புகழாரம் சூடும் !

இனம் வேறு ! மொழி வேறு ! மதம் வேறு !
என்று வேறுபட்ட பாரதத்தை ஒன்றாக்கினாய் !
மிக நன்றாக்கினாய் ! உலக ஒற்றுமைக்கு
குரல் கொடுத்தாய் ! வேற்றுமைக்கு கையசைத்தாய் !

மூன்றாம் உலகப் போரினை முறியடித்தாய் !
நடுவு நிலைமை நாடுகளை உருவாக்கினாய் !
கூட்டுச் சேராக் கொள்கையிலே குரல்கொடுத்தாய் !
அணுவால் அழியும் அகிலத்தைக் காத்தாய் !

அத்தனையும் போதா தென்றாநீ ! துப்பாக்கிச்
சத்தத்தில் சிக்கி தீப்பொறி ஆனாய் !
அரண்மனைத் தோட்டத்து ரோஜாவே !
நின்றன் காஷ்மீரக் கதிர்ப் பூக்கள்
காலமெலாம் கதைபேசும்.

எத்தனையோ திட்டங்கள்
இதயத்தில் ஏந்தினாய்
என்றா ! இத்தனை
குண்டுகள் துளைத்தன !
இந்தஇதயமிலா மனிதரை
ஏனோநீ காணவில்லை !

ஏற்றமிகு தோற்றத்தால் !
எடுப்பான சொல்லால் !
போற்றுகின்ற பண்பால் !
பொலிவான உடையால் !
புன்னகைப் பூக்களை !
பூக்கும் நீ !
அதிகாரம் ஆதிக்கம் செய்யும் போதே !
அங்கங்கே சிதறும் செந்நிறத் துளிகள் !
இங்கேயும் சிதறும் என்பதை மறந்தாயே !

எத்தனை இந்திரா உன்னால் இங்கே !
இனியெங்கே ஜவகரின் இந்திரா இங்கே !
கவிக்குலத்து மேதைநீ !
காவியத்தின் சீதைநீ !
காரிகையாய் வந்ததொரு கீதைநீ !

இனியும் இதயங்கள் வெடிப்பதால்
இந்திராவின் இந்தியா வடிக்கப் படுவதில்லை !
கலங்காத நெஞ்சம், எங்கும்
காற்றாக இயங்கும் என்றா ?
காவலனே கலைத்தான்
நின்னுயிர்க் கூட்டை !
கூடுதான் கலைந்தது !
கொள்கைகள் நிலைக்கும் !
இனிவரும் இந்தியா
நின்பூக்களைச் சூடும் !

கதறாத நின்னைக் கதற வைத்தார் !
காவலரா அவர் ? இல்லை ! இல்லை !
காரிகைநீ சிந்திய ரத்தம் ஒவ்வொரு
துளியும் நின் புகழ் பேசும் !
ஒற்றுமைப் பூக்களே இந்தியா !
இல்லை ! இல்லை ! இந்திரா !
==================================
ஒலி வடிவத்தினைக் கேட்க :

--------------------------------------------------

மயிலுக்குக் குளிருமா ?

2008-07-06T12:38:00.000+05:30

இக்கதை வல்லிம்மாவின் இரண்டு வயது பேத்திக்காக எழுதியது.
------------------------------------------------------------------------------------
ஒரு காடு - கண்ணெ மூடிக்கோ - பிள்ளையார் சாமி கும்பிட்டுக்கோ - அப்பதான் கத வரும் - இப்ப கண்ணேத் தொறந்துகிட்டு கத கேளு.

அந்தக் காட்டிலெ ஒரு மல - அந்த மலயிலெ நெரெய மரம், நெரெய செடி - அங்கே மான், கொரங்கு, எல்லாம் ஓடி விளையாண்டுட்டு இருக்கும் - மரத்துலே பாத்தா இருட்டாத் தெரியும் - நெரெய குயில் கூட்டமா இருக்கும் - வெயில் வரப்போ இடமே இல்லாம காத்து அடிக்கும் போது - அந்த இலைக்கு நடுவுலே லைட் மாதிரி வெயிலு ஒரு கோடாட்டம் வெள்ளிச் சரிகை மாதிரி வரும்.

இந்தக் காட்டிலே - ஒரு பெரிய ராசா இருந்தாரு. அவரு வேட்டைக்குப் போவாரு - அவர் கூட துணைக்கு ஆளுக எல்லாம் போவாங்க ! ஒரு நா ராசா காட்டுலே வேட்டையாடி முடிச்சிட்டு - ரொம்பக் களைப்பா ஒரு மரத்தடியில தங்குனாரு.

அப்ப மழை வர மாதிரி காத்தடிச்சுது - மேகமெல்லாம் கருப்பாயிடிச்சி - இருட்டாப் போற மாதிரி குளிர் வேற இருந்திச்சி . அந்தக் காட்டுலே நெரெய மயிலு இருந்துச்சு - நீல மயில் வெள்ள மயிலுன்னு பல வண்ண மயிலுக இருந்திச்சி. அதுலே ஒரு பெரிய மயிலுக்கு குளிர் தாங்கலே ! - நடுங்கிகிட்டே தோகையே வேற விரிச்சிக்கிச்சி.

ராசா பாத்தாரு - பாவம் அந்த மயிலு - ரொம்பக் குளிருதே - இது என்ன செய்யும் - வயசான மயிலாச்சே - அப்படின்னு யோசிச்சுக்கிட்டே எழுந்து நடந்து போனாரு - அவரு தோளிலே போட்டிருந்த சரிகைத் துண்டே எடுத்தாரு - ராசால்ல - அது நல்ல பெரிய பளபளன்னு இருந்த பட்டு சால்வை - அது சும்மா மின்னிக்கிட்டு இருந்திச்சி - அத எடுத்து குளிர்லே நடுங்கற மயிலுக்கு இதமா போத்தி விட்டாரு - பாத்தியா - மயிலுக்கு பட்டுப் போர்வை கொடுத்த ராசாவெ !

நாமளும் யாருக்காச்சும் குளிர் எடுத்தா - நம்ம கிட்டே இருக்கற போர்வையெக் கொடுத்து உதவனும் - தெரிஞ்சுதா - ராசா தான் பெரிய ஆளுல்லே ! அவரு ஏன் நடந்து போய் போர்வை போத்தனும் ? யாரங்கே ? அந்த நடுங்கும் மயிலிற்கு ஒரு போர்வை போர்த்தி குளிரிலிருந்து மயிலைக் காத்திடுக ! அப்படின்னு கட்டளை இட்டிருக்கலாமில்லே ! - ஆனா அவரு உடனே போயி அவரே போத்தி விட்டாருல்ல - மயிலக் காப்பாத்தினாருல்ல - அது போல உதவி செய்யனும்னா நாமே செய்யனும் - அடுத்தவங்களே செய்யச் சொன்னா - அது வேற மாதிரிப் போயிரும்.

நல்ல புள்ளையா வளரனும் - நல்லவங்களோட பழகனும் - நல்ல பழக்க வழக்கங்களோட இருக்கனும் - அப்பா அம்மா தாத்தா பாட்டி சொல்றதக் கேட்டு நல்லவளா வளரனும் - சரியா !!!

உனக்கு ஒண்ணு தெரியுமா - எங்க பேத்தி சாமி கும்பிடும்போது - அப்பா. அம்மா, தாத்தா, பாட்டி, பாப்பா சொல்ற பேச்சக் கேக்கனும்னு சொல்லுவா. ஏன்னா - பாப்பா சொன்னா யாரு கேப்பா - அதனாலே நான் கேக்கறென்னு சொல்லுவா .

ம்ம்ம்ம் சரியா - வரட்டா

செல்வி ஷங்கர் - 06072008

செய்தவம் ஈண்டு முயலப்படும் - குறள் பற்றிய ஒரு பதிவு

2008-07-02T21:52:00.000+05:30

ஒவ்வொரு செயலுக்கும் ஓர் எதிர் விளைவு உண்டு. இது இயற்கை. விதைத்த விதை முளைப்பதும், முளைத்த செடி வளர்வதும், வளர்ந்த மரம் காய்ப்பதும், காய் கனியாவதும், கனி மீண்டும் விதையாவதும் அடுத்தடுத்த விளைவுகளே !

விடாமுயற்சியோடு செயல் பட்டால் வெற்றி நிச்சயம் என்பது மக்களின் பட்டறிவு. எதிர்த்துப் போராடும் போராட்டக் குணமும், அடக்கி ஆள்கின்ற ஆதிக்க மனமும், வளர்ச்சி காண ஆள்கின்ற அரசும், செயல்களின் சேர்க்கையால் பெற்ற பெரும்பயனே !

தவமென்றால் காட்டிற்குச் சென்று கண்ணை மூடிக்கொண்டு செய்வதல்ல. மனத்தால் அக வாழ்வைத் துறந்து புறத்தால் புற வாழ்வை மேற்கொண்டு துன்பப்படுபவரின் துயர் துடைப்பதே தவம். இது வள்ளுவப் பெருந்தகையின் வாய்மொழி. எப்படித்தான் அவரால் இப்படி எல்லாம் சிந்திக்க முடிந்ததோ ! அறிந்த வரையில் சமுதாயத்தின் ஒரு சாமானியனாய் இருந்திருந்து, சர்வாதிகார அரசுக்கெல்லாம், சமுதாயத்திற்கெல்லாம் எப்படித்தான் சட்டத்தை வகுத்தானோ !

இயலாமையைக் காரணம் காட்டி இவ்வுலகில் எதையுமே செய்யாமல் எத்தித் திரிகின்ற மனப்பான்மை உள்ள மக்களிடையே, சிறிதும் இயலாதவர்கள் கூட பிறருக்கு கை கொடுக்க நினைக்கின்ற எண்ணம் மிகவும் உயர்ந்தது. அது எல்லோராலும் முடிந்ததன்று. இதைச் சொல்கின்ற போது கண்ணதாசனின் சில கருத்துகள் என் நினைவிற்கு வருகின்றன. செருப்பு இல்லை என்பவன் காலில்லாதவன் நிலையை நினைத்துப் பார்க்க வேண்டும் என்று கூறி தன் யதார்த்த வாழ்க்கையையே அர்த்தமுள்ள இந்து மதமாக்கிக் காட்டியது கூட ஒரு வகையில் தவம்தான்.

எண்ணியவற்றை எண்ணியவாறே பெறுவர் - விடாமுயற்சியோடு செயல்படுபவர். இவ்வுலகில் செயல்களைச் செய்யக் கூடியவன் மறு உலகிலும் அதன் பயனைப் பெறுவான். அதுவே தவம். அதனால் தான் அத்தகைய செயல்கள் இங்கும் செய்யப் படுகின்றன. நம் ஒவ்வொரு செயலும் நம் மறுமைக்கு வழி காட்டுவதாய் இருத்தல் வேண்டுமென்பது தான் அனைத்து வேதங்களின் சாரம்.

தன்னுடைய செயல்களைத் தானே செய்துகொள்ள முடியாத நிலையிலும், நான் ஒன்றைச் செய்வேன்; செய்வதன் மூலம் பயன்பெறுவேன்; பெற்ற பயனைப் பிறருக்குக் கொடுப்பேன்; அதுவும் என் போன்று இயலாதவற்கு ஏழ்மையைப் போக்க உதவுவேன் என்கின்ற இந்த நூற்றாண்டுக் கர்ணன் அந்தோணி முத்து செய்தவம் ஈண்டு முயலப்படும் என்றால் செய்தே முடித்துக்காட்டுவான். அவனின் செயல்பாடுகள் இணையத்தில் எல்லோரூம் அறிந்தது தானே ! அப்படி என்றால் இயலாதவர்க்கு மட்டும் தான் முயற்சி என்பதல்ல. அனைவருமே விடா முயற்சியோடு செயல்பட்டு செயல்பயனைப் பெற வேண்டும் என்பது தான் செய்தவத்தின் பொருள். இங்கே செய்தால் அங்கே கணக்கில் கொள்ளப்படும் ! இது எந்தக் கணக்கியல் தத்துவத்திலும் இவ்வுலகில் அடங்காது.

செல்வி ஷங்கர் - 02.07.2008

வலைப்பதிவர் சந்திப்பு - மதுரை - 25.06.2008

2008-06-27T21:35:00.000+05:30

அன்பின் சக பதிவர்களே !!
தோழி நானானி மதுரை வருவதாக எங்க வீட்டு ரங்க்ஸ் சொன்னாங்க. நானும் உடனே கட்டாயம் சந்திக்க வேண்டுமெனக் கூறினேன். சென்ற முறை ரங்க்ஸ் மட்டும் சென்று, திருநெல்வேலி அல்வா சாப்பிட்டு விட்டு, ஒரு மணி நேரம் பேசியதாகக் கூறினார். பதிவு ஏதும் போட்டதாகத் தெரியவில்லை. இம்முறை நானும் சந்திக்க வேண்டுமெனக் கூறியதால் 25ம் தேதி காலை சென்று பேசிவிட்டு வந்து, அன்று மாலை சந்திப்புக்கு ஏற்பாடு செய்து விட்டு வந்தார். நானானியுடன் அவரது கணவரும் வந்திருந்தார்.

இச்சந்திப்பு பற்றிய எனது எண்ணங்கள் :

இந்தக்காலத்துச் சின்னப் பசங்க எல்லாம் பேசிப்பாங்கள்ள ! எங்க வூட்டுக்கு, "கெஸ்ட்" வந்துருக்காங்கன்னு - யாருன்னா "அத்தே!" ம்பாங்க. இப்போ அத்தைங்கற உறவெல்லாம் "கெஸ்ட்" ங்குற நிலைக்குப் போயிடிச்சி. அப்படித்தாங்க நாலு பேரு சந்திச்சாங்க மதுரயிலே ! அவங்க யாருன்னா - நானு, நானானி, எங்க வூட்டுக்காரரு, அவங்க வூட்டுக்காரரு ஆக நாலு பேர்.

பிள்ளைகள் சந்தித்தால் :
உனக்கு எப்போ ஸ்கூல் இல்ல காலேஜ் ?
நீ எப்ப டூர் போன ?
உனக்கு எந்த ஸ்டாரெப் பிடிக்கும் ?
யாரோட "சாங்க்" ரொம்ப இன்டெரெஸ்ட் ? ன்னு பேசுவாங்க.
ரொம்பச் சின்னவங்களா இருந்தா ஒருத்தரோட ஒருத்தர் விளையாடுவாங்க.

இளம் வயதினர் சந்தித்தால் :
தங்கள் கனவுகளைப் பேசுவார்கள் / காண்பார்கள்.

நடுத்தர் வயதினர் சந்தித்தால் :
குடும்பத்தை, குழந்தைகளை, செய்தொழிலைப் பற்றிப் பேசுவார்கள்.

பெரியவர்கள் சந்தித்தால் வாழ்க்கை பற்றிப் பேசுவார்கள்.

"நானானி" என்ற பெயரை நான் வலையில் பார்த்தபோது எனக்கு ஒன்றுமே தோன்றவில்லை. எழுத்துகளைப் படித்த போது மேலோட்டமாக ஒரு எண்ணம் மிகுந்தது. நேரிடையாகப் பார்த்த போது மதிப்பு மிக்க ஒரு தோற்றம், அமைதிப் பொலிவு, இயல்பான சொற்கள் - இதழ் உதிர்த்த போது. இலக்கியம் கற்ற ஆற்றல் - இயற்கையை, சூழ்நிலையை, குடும்பத்தை, பிள்ளைகளை, பணியை, பாசத்தை பகிர்ந்து கொண்ட உரையாடல்.

அவர்கள் தங்கி இருந்த அறைக்கதவு தட்டப்பட்டதும், சிறிது நேர இடைவெளிக்குப் பின் கதவு திறந்தது. கண்களில் மகிழ்ச்சி - இதழ்களில் புன்னகை - அமைதித் தோற்றம் அளித்த நானானி எங்களை அன்புடன் வரவேற்றார்.அந்த நேரம் அவரது கணவர் நட்பினைப் பார்க்கச் சென்றிருந்தார்.

என்ன படித்தோம் - எங்கே படித்தோம் - எப்படிப் பணியாற்றினோம் - எவ்வளவு காலம் சென்னையில் வாழ்ந்தோம் - பிள்ளைகள் வளர்ந்து, படித்து பறவையாய்ப் பறந்தது வரை பேசினோம். பேரப் பிள்ளைகள் பேசி விளையாடுவது - அவர்களின் சூழ்நிலை எல்லாம் நினைவில் நின்றது.

வலைப்பதிவில் ஒருவருக்கொருவர் முகம் தெரியா விட்டாலும், அகமகிழ்ந்து பேசிக் கொள்வதைக் கூறி மகிழ்ந்தோம். பதிவர்களின் பதிவுகள் / பின்னூட்டங்கள் படித்தால் ஒரு அமைதி கிடைக்கிறது. எத்தனையோ வேலைகளுக்கிடையில், இரவு எவ்வளவு நேரமானாலும், அந்த வலைப் பூவினைப் படிக்கையில், உரையாடும் அன்பு வலை ஒரு உற்சாக ஊக்கி என்று பேசி மகிழ்ந்தோம்.

நட்பினைக் கண்டு வந்த நானானியின் கணவரும் எங்களுடன் உரையாடி மகிழ்ந்தார். நாடு - அரசு - அலுவல் - அயல்நாடுகள் என்று கருத்து வட்டம் விரிந்து பறந்து சென்று வலைக்குள் புகுந்தது. ஒரு நல்ல மாலைப் பொழுது இனிமையாய்ப் பறந்தது.

பெற்றவர் ஓரிடம்
பிள்ளைகள் ஓரிடம்
மற்றவர் ஓரிடம்
காலம் - கலாச்சாரம் மாறுகிறது
எதிர்காலம் எப்படி என்ற சிந்தனையுடன்
மாநாடு கலைந்தது.

செல்வி ஷங்கர்
------------------

நான் எனதருமைத் தோழி நானானியை அவரது எண்ணங்களை ஒரு பதிவாகப் போட வேண்டுகிறேன்.
செ ஷ
---------

பாப்பா ! பாப்பா !

2008-02-21T20:56:00.000+05:30

காற்றடித்தால் சிரிக்கும் !
கைபட்டால் சிரிக்கும் !
சேர்த்தணைத்தால் சிரிக்கும்!
சிங்காரப் பாப்பா!!

தொட்டாலும் சிவக்கும்!
தேன்சிட்டாகப் பறக்கும்!
கண்பட்டால் கலங்கும்!
பண்கேட்டால் தூங்கும்!

பஞ்சாகப் பறக்கும்!
நெஞ்சம் குலுங்க
அஞ்சாது பார்க்கும்!
அதற்கென்ன தெரியும் ?
அம்மாவின் தவிப்பு!

திருவிழாவுக்குப் போவோமா !!!

2008-02-08T04:05:00.000+05:30

மதுரை தெப்பத்திருவிழா !!
--------------------------------

சின்னங்சிறு வயதில் செல்லாமலே இருந்து விட்ட திரு விழாக்கள்! இள வயதில் செல்வதற்கே நேரமில்லாத திருவிழாக்கள்! பார்க்க வேண்டும் எனறு மனதில் நினைத்த போது "வா போகலாம்" எனற வாய்ப்பு!!

சாலையில் நடக்கும் போதெ நாற்புறமும் நடமாடும் பார்வை. பார்த்தவுடன் மனத்தில் பரவும் பரவசம். கிடைக்காமல் போன கிளர்ச்சி கிடைத்து விட்டதாய் மனம் குதிக்கின்ற குதிப்பு!

இதுவரை பார்க்காத பலூன்களா ? அதைத் தொட்டுப் பார்க்கத் தூண்டிய மனம். கட்டுக் கட்டாய், காடே வந்தது போல் அடுக்கி வைக்கப்பட்ட கரும்புகள். வெட்டிக் கொடுக்கின்ற வளைக் கரங்கள். அருகில் காசைக் கணக்குப் பார்க்கின்ற அவன்!

நிமிர்ந்து பார்த்தால் கண்கள் மலர்கின்ற மத்தாப்பூப்போல் வானத்தில் வெடிக்கின்ற வாண வேடிக்கை. கூட்டமாய்ச் செல்லுகின்ற குடும்பங்கள், குழந்தைகள், நட்பு வட்டங்கள், வயதைக் கடந்த வாழ்க்கையினர்!

ஓடுகின்ற சின்னஞ் சிறுவர்கள். கால்களை எட்டி நடை போடுகின்ற இளவயதினர்! இவர்களுக்கிடையே கண்ணில் கண்ணாடி, கரங்களைப் பற்றிய கைகள், நடப்பதற்கு மூச்சு வாங்கும் உடலை உள்ளம் ஓடு ஓடு என இசைத்துச் செல்ல, சுற்றிலும் மக்கள் கூட்டம். காவலர் நடமாட்டம். கால் வைக்க இடமில்லை. கடல் போல் சாலை. தடுத்து நிறுத்தப்பட்ட போக்குவரத்து. தெப்பத்தைச் சுற்றி மின்னொளி ! அலை அலையாய் நீர்ப் பெருக்கு குளத்தில் ! கரையோரக் கற்சுவரில் கோடு கிழித்தாற்போல் மக்கள் கூட்டம்.

யானை! இத்தனை காலங்களாயினும் மக்களுக்கு அது வியப்பு தான்! மக்கள் வெள்ளத்துக்கிடையே மலை போன்ற யானை ! சுற்றிலும் கேமரா ஒளி ! ஆம், அங்கே வெளி நாட்டார்! எல்லாமே விந்தையாய் இருந்தது அவர்களுக்கு! தெருவோரக் கடைகள்! கூடையில் கூவும் முறுக்குகள்! கொரிப்பதற்கு பொரியும் பொரி கடலையும் கண்ணாடிக் கூண்டுக்குள்! காலம் மாறி விட்ட கதை சொல்லும் பழக்கூடுக் கிண்ணங்கள் ! ஆம், வெட்டி வைக்கப்பட்ட கலவைப் பழங்கள்! இன்னும் ஆசை. கையில் எச்சி மிட்டாய் கடிகாரம் கட்ட இளைஞர்களுக்கு! மருத்துவத்தின் வளர்ச்சி! அவித்த பருப்பு வகைகள்! ஈச்சங்கிழங்கு; காலம் மாறினாலும் இன்னும் மாறாத பலகார வண்டி கண்ணாடிக் கதவுகளுடன்! சுற்றுகின்ற ராட்டினம்
விதம் விதமாய் !

அங்கங்கே கூட்டம் கூட்டமாய் குடும்பங்கள்! பக்கத்து வீட்டு நட்புடன், கையில் பையுடன், தலையில் தலைப்பாகை, வேட்டிகள் நிறைந்து நடமாட, காலத்தின் நாகரீக வளர்ச்சி கண்ணில் பட, ஜீன்ஸ், சுடிதார்
நடைபோட, இடையே வாரி முடித்த கொண்டையுடன் இடைக் கொசுவமிட்ட சேலைக் கட்டும், தலையிலே மதுரைக்கே உரிய மல்லியும் மணக்க, எல்லோர் நெற்றியிலும் திருநீறு ஒளீ வீசி குங்குமம் எட்டிப் பார்க்கும்.

நான்கு கரைகளிலும் மண் அகல் விளக்குகள் ஒளி வீச, படிக்கட்டுகள் புனிதமாய் காட்சி அளித்தன! நடுவே தெப்ப மண்டபம், ஒளி விளக்கால், கோபுரம் நான்கும் தெய்வீக ஒளி வீசியது. நடுவில் மூங்கில் தெப்பம் பூக்களால் அலங்கரிக்கப் பட்டு, அன்னை மீனாள் அருமைச் சொக்கரோடு தோன்ற, பூந்தெப்பமாய் மின்னொளியில் மிதந்தது. தேரின் வடக் கயிற்றைப் போல, இரு மடங்கு பெரிய கயிற்றால் தெப்பம் இழுக்கப் பட்டது. மக்கள் கூட்டம் வெள்ளமாய் அலை மோதியது. நேரம் செல்லச் செல்ல, பாலமோ பாதையோ கண்ணுக்குத் தெரியாதோ என எண்ணும் அளவுக்கு கூட்டம். மக்கள் அலை.

எல்லாம் சரிதான்! திருவிழாவிற்குச் சென்ற நாம் தெய்வத்தைப் பார்க்க வேண்டாமா ! கையெடுத்து, கடல் அலையாம் கூட்டத்தையே கும்பிட்டு, மனத்தில் மானசீகமாய், இறைவனையும் இறைவியையும் வணங்கி, வழி தேடி, வந்து கொண்டிருந்தோம். தெப்பம் அசைந்தாடும் இறையழகைக் கண்டு, அருள் பெற அலை அலையாய் மக்கள் கூட்டம் அசைந்தது. இச்சூழல் எல்லாம் கண்ட கண்கள் இறைவன் இறைவி தெப்பத்தில் வீற்றிருந்த திருக்கோலத்தை, மறு நாள் செய்தித் தாள்களில் தான் கண்டன.

எப்படி தெப்பத் திருவிழா !

திருவிழாவிற்குச் செல்ல தேகத்திலும் வலிமை வேண்டுமல்லவா ! கண்கள் உள்ளபோதே காட்சியை(கடவுளை)க் கண்டு விட வேண்டும். பின்னர் மனக்கண்ணிலே தான் காண முடியும் கண் தந்த கடவுளை!

காண்போமா திருவிழா!!!!

எப்போது கற்போம் ??

2008-01-27T15:30:00.000+05:30

பூக்களில் உறங்கும் மௌனம் ! எங்கும்
பார்க்காமலே செல்கின்ற உறவு ! இங்கு
ஏக்கங்களை வெளியிடும் பெருமூச்சு !
சின்னஞ்சிறு விரல்களின் உழைப்பு !
மொட்டுக்கள் வெடிக்காமல் மடியும்
உரிமை மறுத்து மடியும் புவியியல்!
வளர்ச்சியும் மகிழ்ச்சியும் மறுத்து
மண்ணில் நடக்கும் மனம்!
வெள்ளம் அடித்துச் சென்ற வாழ்வு
புயல் வீசிச் சென்ற பூங்கா
நிலம் அதிர்ந்து வீழ்ந்த மக்கள்
பெருமழை பேயாய்ப் பொழிந்த காலம்
வரும் வருமெனக் காத்திருந்து
வாராத கரையோரக் கனவுகள்
எல்லாம் எங்கே பேசின நம்மோடு ?
ஓடங்கள் ஓடிய ஓரங்களில் உள்ளம்
ஓய்வாகப் பார்க்கும் பார்வை! எல்லாமே
பூக்களில் உறங்கும் மௌனம் தானே!
உள்ளம் எப்போது கற்கும் அம்மொழியை ?

உணர்ந்தால் உரையுங்கள்

2008-01-12T06:01:00.000+05:30

காலம் ஒரே மாதிரி தான் ஒடுகிறது!
மக்கள் தான் மாறுகின்றனர்! எப்படி!
அதே இடம்! அதே செயல்!
ஆனால் மனிதர்கள் மாறுபட்டவர்கள்!
நினைத்தாலே இனிக்கின்றது நிகழ்வு!
இப்படியும் நடக்குமா? என்பதெல்லாம்
எப்படியும் ஒரு காலத்தில் நடக்கிறது!
நினைத்துப் பர்ர்க்க நேரமில்லா
ஒட்டம்! திரும்பினால் திருப்பு முனை!
கால ஒட்டத்தில் கரையேற நாம்
கடந்து வந்த பாதைகள் கவிதை
பாடுகின்றன! கடமையைச் செய்!
பயனை எதிர் பாராதே! இது கீதையின்
மொழி! இதைப் புரிந்து கொள்ள
எத்தனை காலங்கள்! விதிக்கப்
பட்டதை மாற்ற எவராலும் முடியாது!
இதுதான் இம்மொழியின் தத்துவம்!
இதை உணராத நம்மில் எத்தனை
மாற்றங்கள்! தடுமாற்றங்கள்!
தடுக்கி விழுந்ததற்குக் கூட காரணம்
அறியாத நாம் தவிப்பது ஏன்!
எப்போது உணர்வோம் இதனை?
எப்போது உணர்த்துவோம் உரிமையை?
உணர்ந்தால் உரையுங்கள்!

கேட்டதின் விளைவு

2008-01-09T06:21:00.000+05:30

எதார்த்தம் வாழ்க்கை என்றால்
எதிரி கூட பொறாமைப் படுவான்!
அப்படியொரு இயக்கம் வேண்டும்.
நாம் உறுதியோடு உழைத்தால்
வியர்வை கூட இனிக்கும்.
மனம் நெகிழ்ந்தால் மயக்கும் மழலை!
மாறுபாடு தெரியாது !
எண்ணங்களின் எதிரொலி வீட்டின்
சுவர்களில் கூட ஒலிக்க வேண்டும்!
உள்ளத்தின் தூய்மை உதட்டில்
ஒளி வீச வேண்டும்! உருக்கம்
உன் செயலால் வெளிப்பட வேண்டும்!
எதையும் பார்த்து ஏமாந்து விடக் கூடாது!
ஏக்கம் கூட வெளியே தெரியக் கூடாது!
அப்படியொரு அமைதி வேண்டும்.
அமைதி ஆயிரம் தரும்.
ஆரவாரம் அதிர்ச்சியை ஏறபடுத்தும்.
அழகுணர்ச்சி அன்பில் வெளிப்பட வேண்டும்.
ஆக்கம் கண்ட போது அது அன்புப்
பெருமூச்சாய் வெளிப்பட வேண்டும்.
வெற்றிகள் இயல்பானதாகவும்
தோல்விகள் நடைமுறைகளாகவும் தோன்றினால்
துன்பங்கள் நம்மைத் தூய்மைப்படுத்தும்.
தவிப்புகள் பார்வையால் உணர்த்தப்பட வேண்டும்.
அப்போதுதான் ஒரு பண்பான
வாழ்க்கையைப் பர்ர்க்க முடியும்.
இவை இறுக்கமான மனத்திற்கு இன்னிசையாகும்.

ஏன் ??

2008-01-03T04:50:00.000+05:30

அழிவு ஒன்று தான் முடிவா ?
ஆற்றல் ஏன் வீணாகிறது ?
நாட்டை ஆள்வது
சுகம் என்றால்
நல்லோர் வாழ்வது சுமையா ?

நடவடிக்கை விரைந்தால்
கடைக்கோடி மனிதனும்
நலம் பெறுவானே!
நாம் மட்டும் வாழ்ந்தால் போதுமா ?

எங்கே இல்லை
குறைகள் ? எங்கே
இல்லை சுமைகள் ?
களைவதும் சுமப்பதும் சுகந்தானே !

வெற்றிகள் விளைவதில்லை
வேர்கள் பதியவேண்டும் !
குற்றங்கள் குறைய வேண்டும்
குறிக்கோள் உயரவேண்டும் !

பூக்களில் உறங்கும் மவுனம்.

2007-12-22T15:45:00.000+05:30

என் பாக்களில் காணும் ஏக்கம்!
உன் எண்ணங்களால் வந்த தாக்கம்!
சுற்றி உள்ளவர்களைப் பார்த்தேன் ஆம்!
சுவர்போல் உணர்ந்தேன் அவர் பார்வையை!

மாறாதது உலகம் என்றார்கள்! இல்லை!
மாற்ற முடியாது இந்த மனிதர்களை!
சொல்வது போல் செய்ய வில்லையே!
சுயநலந்தான் சுற்றிச் சுற்றி வருகிறதே!

காசு கொடுத்தால் கூட கனிவாகப்பேச
காலநேரம் பார்ப்பர்! சொற்கள் சுடுகின்றனவே!
என்ன வந்து விடப் போகிறது!
இவர்களின் இன் முகப் பார்வையில்!

புரிய வில்லையே! இந்த புதிர்போடும்
மனிதர்க்கு! புன்னகைப் பூக்களைப் பூத்தாலென்ன!
புவி என்ன சாய்ந்தா போகும்!
அன்பாகச் செய்தால் அது பண்புதானே!

ஆலயம் சென்றா அறத்தைச் செய்யவேண்டும்!
மனமே மாபெரும் கோவில்! அங்கே
மாண்புறு எண்ணங்களே ஒளி விளக்கு!
மாறாத நினைவுகளே மாண்புடையான் வழிபாடு!

மாபெரும் உலகத்தை மண்ணில் வாழவிடுவோம்!
மாந்தருக்குள் அன்பு செய்வோம்! இங்கே
மழலையரை மாந்தர்களாய் ஆக்குவோம்! இனி
பூக்களில் உறங்கும் மவுனங்கள் போதும்!

புதுமலராய் புன்னகைப்போம்! புவிவாழ பூங்கா
வனம் அமைப்போம்! புதுமணம் பரவட்டும்!
பூக்கள் மலரட்டும்! பாக்கள் பேசட்டும்!
அதில் ஆக்குவோம் அன்பு வலையை!

செல்விஷங்கர்
22.12.2007

உலகம் இவ்வளவு தான்

2007-12-05T03:42:00.000+05:30

காலம் கடந்த பின் தான் அதன் அருமை புரியும். நினைத்துப் பார்க்க நேரமில்லாமல் ஓடிய காலங்களை இப்பொழுது நம் மனத் திரையில் கொண்டு வந்தால் அது நம்மைப் பார்த்து நகைக்கும். என்ன ஓய்வா ? என்று! சுற்றிச் சுற்றி சுழன்ற கால்கள் இன்று சுகமாக நடைபோடுகின்றன. அது எப்படி வந்தது இந்த மன நிறைவு! சுற்றும் உலகம் ஒரு நொடி நின்றால் தெரியும் !

புத்தன் கூட ஆசைப்பட்டானாம். உயிர்கள் துன்பப்படக் கூடாதென்று!
ஆசையைத் துறப்பதற்கு மனம் எளிதில் துணியாது. பற்றினை விடுவதற்கு பற்றற்றவனின் பாதங்களைப் பற்றுக என்கிறான் வான்மறை புலவனும். ஆசைகள் எப்படி நம்மை விட்டு அகல்கின்றன? அலை மோதும் நீரின் சுழற்சி போல் நம் எண்ண அலைகள் கரை மோதுகின்றன.

நினைத்துப் பார்த்தால் உலகம் இவ்வளவுதான். அதில் ஏன் இத்தனை மோதல்கள்? இயற்கையை வளர மறுக்கும் சூழல்கள் ! ஏழை வாழ்ந்தால் என்ன? எதற்காக அவன் வசதிகளை வாய்ப்புள்ளோர் சுரண்ட வேண்டும்?

நடக்கும் தொழில் ஊழல் ஏன்? அது நடந்தால் என்ன? நாடு நலம் பெற வேண்டாமா? ஏன் திட்டங்கள் செயல்களாக மறுக்கின்றன! மறைக்கின்ற மனிதர்கள் மனந் திருந்துவார்களா? கொதிக்கின்றனர் குறைபாடுடை யவர்கள். அந்த ஏழைகளின் வாழ்வு மலர வேண்டாமா? ஏற்றமுடையோர் இயல்பாகச் செயல் பட்டால் என்ன ? அந்தச் செம்மையுடை யோருக்காகத் தானே இந்த உலகம் இத்தனையும் தாங்கிக் கொண்டிருக்கிறது! எதிர்த்து ஒரு வார்த்தை கேட்பதில்லை! இதைப் புரிந்து கொண்டாவது நாம் செயல் படக் கூடாதா?

நலிந்தோரை நலமாக நடமாட விடுவோம்!
நாட்டின் பயன்கள் அவர்களைச் சென்றடையட்டும் !

வளமான நாடு உருவாகட்டும்!!!!

காலம்

2007-11-03T00:56:00.000+05:30

நம்மைக் கடந்து கொண்டே இருப்பது !
சில நேரம் நாம் அதைக் கடப்பது !
சுற்றுகின்ற முட்களுக்கு கடிகாரம் சிறை !
கடக்கின்ற நாட்களுக்கு இளமை சிறை !
கண்ணை மூடிக்கொண்டாலும் காலம் சுழலும் !
நம்மை இயக்கிக் கொண்டே ஞாலம் மாறும் !
எண்ணங்கள் எல்லாம் இறந்த காலங்களே !
எண்ணி முடிப்பதற்குள் அவை நம்மை கடக்கும் !
எதிர்காலம் எப்படியும் நம்மை நோக்கி நகரும் !
நிகழ்காலம் தான் நம் நினைவின் இலக்கு !
அதை நாம் நிறைவேற்றினால் மனச்சுமை குறையும் !
காலத்தால் அழியாத காவியங்கள் இயற்கை !
இன்னும் இளைஞர்களுக்கு அவை ஒரு சுவை !
கடற்கரை என்றைக்கும் மனச் சிறை தான் !
மலைச் சாரல் மகிழ்வின் ஊற்றே மனத்திற்கு !
காடுகள் நம் உள்ள ஏடுகளைப் புரட்டும் !
கனலும் நெருப்பும் காலத்தின் கைகள் !
பொழிகின்ற மழை விழிகளில் இறங்கும் திரை !
எந்தக் கவிஞனின் மனத் திரையிலும் மயிலாடும் !
செவியினில் இன்குயில் பாடும் ! எல்லாம்
இயற்கையின் கோலம் ! புள்ளி வைக்காமலேயே
புதிர் போடும் கோலங்கள் ! காலத்தின் சுவடுகள் !

இது புதுமை!

2007-10-18T08:45:00.000+05:30

சித்திரங்கள் சிரித்தன!
சின்ன விரல்கள்
சிந்திய வண்ணங்கள்!
பூப்போல் எடுத்து
புன்னகையால் அணைக்க
புரியாத மொழியில்
மலர்ந்தன மின்விழிகள்!
கொஞ்சும் மழலையரின்
பஞ்சு விரல்கள்
பார்வைக்குள் பனித்தன!
பாசமென்ற கைகளுக்குள்
பனிமலராய்ப் பூத்தன!
இது புதுமை! இது புதுமை!

எப்பொழுது கேட்டாலும் இனிக்கும் !
பார்வை மொழியில் பனி மலரும் !
பிஞ்சு விரல்கள் அசைந்து
காலடியில் இசை பாட சுவைக்கும் !
கண்ணுக்குள் நிற்கும் கவிதை !
என்னுள் குதிக்கும் இனிமை !
இந்த மழலையரின் சொல்லுக்கு
மயங்கும் சுவைத் தேன் நான் !
சுட்டிப் பிள்ளைகள் எட்டிப்
பார்க்கும் திரை என் மனத் திரை !
மனத்திற்கு மகிழ்வூட்டும் மான்கள்
என் கண்ணின் மணிகள் !

எனக்கொன்றும் புரியவில்லை

2007-10-18T08:35:00.000+05:30

அதென்ன அப்பா என்றால்

செய்தித்தாள் படிப்பார்!

அம்மா எப்பொழுதும்

அடுக்களையில்! சமைப்பார்!

எது நடந்தாலும் ஏன் ?

எப்படி அது அவளுக்குத்

தெரியாமல் போனது ?

இது கூடத் தெரியாவிட்டால்

இவள் என்ன பெண் ?

இசைக்கின்ற வானொலி செவியில்

பிள்ளைகளின் சீருடை

மடித்து வைத்த காலுறை

அடுக்கி வைத்த புத்தகம்

அடுத்த நாள் செய்ய வேண்டிய

இன்றைய வீட்டு வேலை!

அலுவலகம் செல்ல அமைதியாய்

இருக்கும் கைப்பை !

கட்டும் போது மடிப்பில்

தெரியும் காப்பிக் கரை!

எப்பொழுது மூச்சு விடுவாள் இவள்!

இத்தனைக்குப் பின்னும்

இவளுக்கு என்ன தெரியும்

ஏதாவது புரியுமா? இது வேத வாக்கு!

இருந்தாலும் அவள்தான் இங்கே உலகம்!

என் மொழி - 2 !!

2007-10-10T20:43:00.000+05:30

சிந்தனைப் பூக்களின் தொடர்ச்சி :

---------------------------------------------------

பேசாமல் பேசும் வித்தையைக் கற்றுக் கொள் !

வள்ளுவத்தைப் படித்தால் வாழ்க்கை மேம்படும் !

வானவில்லை வளைக்க முடியாது.

ஆனால் வாழ்வை வானளவு உயர்த்தலாம் !

என்ன மனிதர்கள் இவர்கள் - எண்ணத்தால் தாழ்ந்தவர்கள் ?

எப்படிப் பார்த்தாலும் வாழ்க்கை வட்டப்பாதை

தான் ! ஏன் வழி தடுமாற வேண்டும் ?

சொன்னால் சிரிக்கின்ற செயல்களை எல்லாம் மனிதன் செய்துகொண்டு தான் இருக்கிறான்.

எண்ணத்தால் தாழ்ந்த மனிதர்கள் எளிதில் எதிர்படுவதில்லை.

பூட்டி வைத்ததிலும் திறக்க முடியாத எண்ணங்கள் மனக்கதவைத் தட்டிக் கொண்டுதான் நிற்கும்.

காற்றில் பறக்கவும், கடலில் மிதக்கவும், நிலத்தில் தாவவும், நெருப்பில் நிற்கவும் நீ என்ன தமிழா ? நினைவுகளைப் புடம் போட்டுக்கொள்; புத்துலகுக்கே சென்று வரலாம் !

காற்றடித்தால் பறப்பது குப்பைகள் மட்டுமல்ல !

கலைந்த எண்ணங்களும் தான் !

ஏற்றி விடுவதற்கு ஒருவர் இருந்தால் இறங்குவதற்குக் கூட துணை தேடுவோம் !

---------------------------------------------------------

சிந்தனைப் பூக்கள் இன்னும் பூக்கும் !

---------------------------------------------------------

என் மொழி - 1 !!!

2007-10-07T23:25:00.001+05:30

நீங்கள் நீங்களாக இருங்கள் !

வேறு யாராகவும் இருக்க வேண்டாம் !

ஒழுங்குக்கும் கட்டுப்பாட்டுக்கும் இடையே

இடைவெளி குறைந்தால் உண்மை போய்விடும்.

உரிமை அதிகமாக அதிகமாக ஒழுங்கு கெட்டுவிடும்.

அமைதி ஆயிரம் எண்ணங்களைத் தரும்.

சொல்லில் தடுமாற்றம் இருக்கிறதென்றால் கருத்தில்

முரண்பாடு உள்ளதென்று பொருள்.

கேட்டுப் பெறுவது சிறப்பல்ல-

கேட்காமலே வருவது உயர்வு !

செயல்களைச் செய்யாமல் இருப்பது இயல்பன்று !

எல்லோரும் உன் கருத்தை ஏறகவேண்டும் என எதிர்பார்க்காதே !

அடுத்தவர் கருத்தை எதிர்க்காதே !

காசும் பணமும் காலங் கடந்து வருவதால் பயனில்லை !

அன்பைக் கேட்டுப் பெற முடியாது - கொடுத்துப் பெறலாம்.

பாசம் விலை பேசப்படக்கூடாது !

நமக்காகத்தான் பொருள் - பொருளுக்காக நாமில்லை !

உண்மை உள்ளத்தில் இருக்க வேண்டும் ! உதட்டில் அல்ல !

இன்சொல் பேசுவதால் நா வடுப்படுவதில்லை!

எல்லாச் செயலுக்கும் ஒரே முயற்சிதான் -

ஏன் வன்சொல் பேச வேண்டும் !

அன்பு எதையும் கேட்பதில்லை !

உண்மை நம்மை உயர்த்துவது !

விளையாட்டிற்குக் கூட பொய் பேசாதெ !

எல்லாவற்றையும் கேட்டுக்கொள் !

எப்போதாவது பேசு !

எதற்கெடுத்தாலும் காரணம் தேடாதே !

எதையும் தள்ளிப் போடாதே ! இயல்பாய் இரு !

எப்படிப் பார்த்தாலும் இங்கே மக்கள் - வேறுபட்டவர்கள்தான் !

உடன்பாடு என்பது உள்ளத்தில் வரவேண்டும் !

வேற்றுமையில் ஒற்றுமை கண்ட நாம் இன்று என்ன

செய்து கொண்டிருக்கிறோம் ?

நினைத்தது நினைத்தபோதில் கிடைத்தால் அது சொர்க்கம் !

தேவை இல்லாத போது தேவாமிர்தமே கிடைத்தாலும் பயனில்லை !

முரண்பாடு உடையது உலகம் !

உடன்பாடு ஏற்படுவது அரிது !

உழல்வது தான் எளிது !

காலங்கள் கடந்து கொண்டு தான் இருக்கும் !

நாம் நடந்து கொண்டிருக்கும் போது !

நற்பெயர் எடுப்பது என்பது எல்லோராலும்

முடியாது ! அது ஒரு சிலருக்கே வாய்க்கும் !

வாழ்க்கை என்பது வசம் தான் [வசந்தம்]

நாம் வாழ்ந்து பார்த்தால் !

எப்பொழுதுமே கடந்த காலங்கள் மேன்மையாய்

இருக்கின்றன ; நிகழ்காலத்தை மட்டுமே கருத்தில்

கொள்பவர்களுக்கு !

வருவதும் போவதும் தானே வாழ்க்கை !

ஊமை நெஞ்சங்கள் உறங்குவதில்லை !

செல்வி ஷங்கர்

அமைதி

2007-10-07T23:18:00.000+05:30

ஆண்டவன் சந்நிதியில் கிடைப்பது !

அருந்தமிழின் சுவையில் திளைப்பது !

ஆற்றலின் விளிம்பில் அலை பாய்வது !

ஆசையை நினைத்து அன்பில் நிலைப்பது !

இருப்பதைக் கொடுத்து இன்முகம் காண்பது !

துயரத்தைப் போக்கி துன்பம் துடைப்பது !

மழலையின் சிரிப்பில் மடியில் காண்பது !

இன்னிசையின் மென்மையில் சுவைப்பது !

இலக்கியத்தின் இதழ்களில் மலர்வது !

நெடுந்தூரப் பயணத்தின் நிம்மதியில்

உணர்வது ! அடுத்தவ்ரின் அன்புச்

சிரிப்பில் சிந்துவது ! ஆக்கத்தின்

வளர்ச்சியில் வாழ்வது ! அமைதி !

சமுதாயம்

2007-10-07T23:11:00.000+05:30

எதைச் செய்தாலும் குற்றம் சொல்லும் !

எப்படிக் குறை களைவது !

தன்னலச் சேற்றில் சதிராடும் !

பொதுநல மேடையைப் புறக்கணிக்கும் !

நன்மை வரும் என்றால் உண்மை

வேண்டும் செயலில் ! உழைப்பில்

உயர்வு வேண்டும் ! எத்தித்

திரியும் செயல் கூடாது ! ஏற்பதைப்

பொதுவில் வைக்க வேண்டும் !

மறைப்பதை மறுக்க வேண்டும் !

உருப்பட வேண்டும் என்றால் முதலில்

தடுப்பதை எல்லாம் தவிர்க்க வேண்டும்!

தவறுகள் களைய வேண்டும் !

தனித்தன்மை ஓங்க வேண்டும் !

பிறந்த நாள் வாழ்த்துகள்

2007-10-04T21:48:00.000+05:30

பிறந்த நாள் (05.10.2007) காணும் பெரிய பெண்ணே !

பெருமைகள் யாவும் பெற்றிடுவாய் !

அருமைச் செயல்கள் யாவும் புரிவாய் !

கொண்டான் குழந்தைகள் பேணிடுவாய் !

குடும்பம் செழிக்க குலமகள் நீயே

சிறந்திடுவாய் ! அன்பும் பண்பும்

ஆற்றும் கடமையில் சிறந்திடவே !

எல்லாம் வல்ல இறைவன் என்றும்

உனக்கே துணை புரிவான் !

வல்ல கணபதி வளர்ந்திட உன்னை

வாழ்த்திடுவார் ! என்றும் உனக்கே

எங்கள் வழிபாடு ! வாழ்க வாழ்க !

பல்லாண்டு ! வளமுடன் வாழ்க

நல்லாண்டு !

அன்புடன் செல்விஷங்கர்

வசந்தம்

2007-10-01T23:10:00.000+05:30

இயற்கையின் இனிமை
இன்பத்தின் தனிமை
காற்றில் கரைந்த சுகந்தம்
ஆற்றில் மலர்ந்த ஆம்பல்
ஏட்டில் படர்ந்த பசுமை
பாட்டில் தவழ்ந்த மழலை
காலங்கள் தந்த கவிதை
பாலங்கள் இணைத்த பான்மை
வாழ்க்கையில் வீசிய தென்றல்
பார்க்கையில் சுவைத்த கன்னல்
வாழ்ந்தவர்க்குக் கடந்த காலம்
வாழ்பவர்க்கு நிகழ் காலம்
வருபவர்களுக்கு எதிர்காலம்
இறைமைக்கு எப்போதும் !!!!

நினைவு

2007-10-01T05:03:00.000+05:30

நிலையாய் இல்லாதது

நிலைகளைக் கடந்தது !

காலத்தின் தத்துவம்

காலத்தால் கலைவது!

வளர்ச்சியில் உறைவது!

வாழ்க்கையில் வளர்வது!

எங்கெங்கோ ஓடி

எதையெல்லாம் தேடி

எதிர்பார்ப்பதை நாடி

ஏற்றத் தாழ்வுகளை மோதி

ஏற்பதை எதிர்கொள்வது!

இதற்கெல்லாம் விளக்கங்கள்

விளங்குவதில்லை விடியலில்

மாலைக்குள் மடிவதில்லை!

மறுநாளும் மலர்வது தான்!

வாழ்க்கை

2007-10-01T04:52:00.000+05:30

வளர் சிதை மாற்றங்கள் உடையது

வாழ்ந்தவர் கோடி இங்கே!

வாழ்பவர் கோடி கோடி இங்கே!

வாழ்க்கை - காலங்காட்டாது!

இலக்கணத்தில் தொழிற்பெயர்!

இலக்கியத்தில் காப்பியம்!

விதிகள் இல்லாதது! விதிகளுக்குள் கட்டுப்பட்டது!

விளக்கங்கள் கூற முடியாதது!

கூறினால் அகமில்லை!

புறம் ! புறத்தினுள் புதுமையானது!

நாட்டுக்கும் மொழிக்கும் வேறுபட்டது!

நாட்டமெல்லாம் பொதுவானது!

சொல்லிக் கொடுத்த பாடமில்லை!

சொல்லாமல் கற்ற கவிதை!

கடமை

2007-09-25T23:38:00.000+05:30

காலந் தவறாமல் செய்ய வேண்டும் !
கடின உழைப்பால் பெற வேண்டும் !
உழைப்பால் உயர உண்மை வேண்டும் !
ஆற்றிய பணிகள் சொல்லும் நம்மை !
போற்றிய செயல்கள் பேசும் நம்பெருமை !
விட்டுக் கொடுத்தால் உயர்வோம் !
வீட்டில் கடமை வெளியில் கடமை
வேத வாக்காய் விளங்க வேண்டும் !
பிள்ளைகள் பேச்சும் செயலும்
பெற்றோர் பின்புலம் ! மற்றவர்
பார்வை நம் உட்புலம் !
நல்ல உள்ளங்கள் நல்ல செயல்கள்
நாம் பெற்ற பேறு ! கற்றதின் பரிசு !
நன்செயல் எண்ணவும் இன்சொல் பேசவும்
தயங்காதே ! இதில் என்ன சுமை !
சுவை தானே இவை !
காலத்தால் அழியாத கவி அல்லவா !
ஆற்றிய பணிகள் சொல்லும் நம் அருமை !

மக்கள்

2007-09-25T07:40:00.000+05:30

மரங்களை நட மறப்பவர்கள் !
உரங்களை மட்டும் இடுபவர்கள் !
இயற்கையைக் காக்க மறுப்பவர்கள் !
செயற்கையின் செழிப்பை அழிப்பவர்கள் !
இருப்பதை இழந்து விட்டு இங்கே
இல்லாததைத் தேடுபவர்கள்

உலகம்

2007-09-25T07:37:00.000+05:30

ஓடிக்கொண்டிருப்பது !
நிற்பதற்கு நேரமில்லாதது !
இன்று விட்டால் நாளை இல்லை !
காலத்தால் மாறுவது !
கவிதையில் சிறப்பது !
உயிர்களைச் சுமப்பது !
உணர்வுகளை விதைப்பது !
மாற்றங்களை காண்பது !
மாற்றம் இல்லாதது !

அரிச்சுவடி

2007-09-25T07:28:00.000+05:30

அன்பு காட்டு !
ஆற்றல் கொள் !
இன்பம் உணர் !
ஈகை செய் !
உண்மை உரை !
ஊதியம் போற்று !
எதையும் எதிர்கொள் !
ஏற்றம் காண் !
ஐயம் அகற்று !
ஒற்றுமை உயர்வு !
ஓவியம் சுவை !
ஒளவியம் அகற்று !
ஆய்தம் [ஃ] பயில் !

ஏன் ?

2007-09-25T07:25:00.000+05:30

கண்கள் கசிவதற்குக் காரணம் என்ன ?
கருத்துகள் கலங்குவதற்கு அடிப்படை எது ?
புன்னகை பூப்பதற்கு பூமியே சுழல்வதேன் ?
பூக்களைப் பறிப்பதற்கு புத்துணர்வு ஏன் ?
பாக்களைப் படிப்பதற்கு பல்சுவை ஏன் ?

ஏங்குவது

2007-09-22T22:41:00.000+05:30

தரணியில் வாழ தாரக மந்திரம்
வேண்டாம்! ஊரக உணர்வு
வேண்டும்! எல்லாம் ஆசை தானே!
இல்லையெனில் உலகேது?

நினைத்தது

2007-09-22T22:39:00.000+05:30

அன்பு காட்டப்பட வேண்டும்!
பாசம் உணர்த்தப்பட வேண்டும்!
பரிவு செயல்களில் வேண்டும்!
கண்களில் கருணை வேண்டும்!
கைகளில் செயல்கள் வேண்டும்!
மொத்தத்தில் தன்னைப் போல்
பிறரை எண்ண வேண்டும்!

நிகழ்ந்தது

2007-09-22T22:36:00.000+05:30

அன்புக்கும் ஆசைக்கும்
அடித்தளம் இல்லாமல்
ஆளாக வளர்ந்தேன்!
காசு கொடுத்தால் கிடைக்குமா இவை!
என்னே! அறியாமை!
எங்கே இருக்கிறது உலகம்?
ஏட்டுக்குள் இருக்கிறதா? இல்லை
வீட்டுக்குள் இருக்கிறதா?